តារាស្រីកូរ៉េម្នាក់ ត្រូវអតីតស្វាមីបោ.កលុយអស់ពីខ្លួន ឥលូវទៅធ្វើជាអ្នកបើកតាក់ស៊ី រកលុយចិញ្ចឹមកូន និង ឪពុកមានជំងឺមហារី-ក

ថ្មីៗនេះ អតីតតារាសម្តែងស្រីជនជាតិកូរ៉េ វ័យ​ ៤៦ ឆ្នាំ Jung Ga Eun បានទម្លាយពីរឿងរ៉ាវជីវិតដ៏ជូរចត់របស់នាង ដែលត្រូវអតីតស្វាមីបោកប្រាស់លុយអស់ពីខ្លួន រហូតដល់នាងត្រូវមកចាប់អាជីពជាអ្នកបើកតាក់ស៊ីដើម្បីចិញ្ចឹមកូន និង ឪពុកដែលកំពុងកើតជំងឺមហារីកបំពង់អាហារ។

តាមព័ត៌មានបានឱ្យដឹងថា ក្នុងឆ្នាំ ២០១៨ នាងបានលែងលះជាមួយស្វាមី ដោយសារតែគេយកឈ្មោះទៅបោកប្រាស់លុយអ្នកដទៃជាង ៦៦០ ករណី សរុបទឹកប្រាក់ប្រមាណ ១៣.២ ពាន់លានវ៉ុន ហើយថែមទាំងបោកលុយនាងអស់ ១០០ លានវ៉ុនទៀត រួចក៏រត់គេចខ្លួនទៅក្រៅប្រទេសបាត់ មិនដែលសូម្បីតែផ្ញើលុយមកចិញ្ចឹមកូនសូម្បីតែម្តង។ នៅពេលនោះ នាងពិតជាអស់ជម្រើសខ្លាំងណាស់ ហើយក៏សម្រេចចិត្តចាប់អាជីពថ្មី គឺអ្នកបើកតាក់ស៊ី ព្រោះអាជីពនេះ គឺធ្លាប់ជាអាជីពរបស់ឪពុកនាងមកដែរ ដោយនាងសង្ឃឹមថានឹងរកប្រាក់ចំណូលមកចិញ្ចឹមកូនស្រី និង ឪពុកដែលកំពុងតែធ្លាក់ខ្លួនឈឺជំងឺមហារីកបំពង់អាហារ។

យ៉ាងណាមិញ នាងបានឱ្យដឹងថា អាជីពជាអ្នកបើកតាក់ស៊ីអាចរកចំណូលឱ្យនាងបានច្រើនណាស់ អាចរកបានដល់ទៅ ១០ លានវ៉ុនឯណោះក្នុងមួយខែ បើសិនជាឧស្សាហ៍ខំប្រឹងខ្លាំង ហើយសម្រាប់នាង ការបើកតាក់ស៊ីនេះ​មិនត្រឹមតែដើម្បីចំណូលនោះទេ តែវាក៏បានជួយឱ្យនាងព្យាបាលអតីតកាលដ៏សែនឈឺចាប់ផងដែរ៕

ប្រភព៖ Sanook