កាលពីល្ងាចថ្ងៃទី ០៥ ខែមីនា ឆ្នាំ ២០២៥ កន្លងទៅនេះ ក្រសួងវប្បធម៌ និង វិចិត្រសិល្បៈ បានរៀបចំកម្មវិធី «អបអរមហាបវរធិបតី សាទរទិវាវប្បធម៌ជាតិ ៣មីនា លើកទី ២៧» និង «ពិធីសំណេះសំណាល ពិសាអាហារសាមគ្គីជាមួយសិល្បករ សិល្បការិនីលើកទី ៦» ដោយមានការចូលរួមពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោក ជំទាវ ព្រមទាំងថ្នាក់ដឹកនាំក្រសួង ស្ថាប័នពាក់ព័ន្ធ និង សិល្បករ សិល្បការិនីជាច្រើនរូប។
ក្នុងនោះ អ្វីដែលគួរឱ្យចាប់អារម្មណ៍កម្មវិធី «អបអរមហាបវរធិបតី សាទរទិវាវប្បធម៌ជាតិ ៣មីនា លើកទី ២៧» និង «ពិធីសំណេះសំណាល ពិសាអាហារសាមគ្គីជាមួយសិល្បករ សិល្បការិនីលើកទី ៦» ឃើញមានវត្តមានរបស់តារាសម្តែង និង តារាចម្រៀងកម្ពុជា ដែលបានទៅរស់នៅឯសហរដ្ឋអាមេរិកអស់រយៈពេលជាច្រើនឆ្នាំ ក៏បានអញ្ជើញចូលរួមដែរ ដោយក្នុងនោះរួមមាន តារាសម្តែងជើងចាស់ ឯកឧត្តម យស ប៊ូវណ្ណៈ និង ភរិយា លោកជំទាវ លី ស៊ីថារី, តារាចម្រៀង ឆោម និមល, តារាចម្រៀងជើងចាស់ ព្រួញ ដាវី, លោក នៅ ស៊ីនឿន និង តារាចម្រៀង តារាសម្តែងជើងចាស់ជាច្រើនទៀត។
ដោយឡែក អ្វីដែលកាន់តែពិសេសទៀតនោះ កាលពីថ្ងៃទី ០៣ ខែមីនា ឆ្នាំ ២០២៥ កន្លងទៅ តារាសម្តែងជើងចាស់ ឯកឧត្ដម យស បូវណ្ណៈ និង ភរិយា លោកជំទាវ លី ស៊ីថារី ព្រមទាំង អ្នកនាង ព្រួញ ដាវី, អ្នកនាង ឆោម និមល, លោកស្រី មាស សាលី, លោក ថោង តារាឆាយា និង លោកស្រី ផ្លុង រិទ្ធី ដែលជាសិល្បករ សិល្បការិនីរស់នៅឯសហរដ្ឋអាមេរិក ត្រូវបានបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បំពាក់មេដាយថ្នាក់ជាតិជូន។
ក្នុងនោះដែរ មេដាយថ្នាក់ជាតិ ដែលក្រសួងវប្បធម៌និងវិចិត្រសិល្បៈបានជូនទៅដល់សិល្បករ សិល្បការិនីខាងលើនេះដែរ ក្នុងន័យនេះ គឺដើម្បីជាការលើកទឹកចិត្តដល់កិច្ចខិតខំ ប្រឹងប្រែងយ៉ាងសកម្មរបស់សិល្បករ សិល្បការិនី ដែលបានលះបង់ទាំងកម្លាំងកាយចិត្តទាំងពេលវេលា និង ស្មារតីក្នុងការថែរក្សា និងលើកតម្កើង ផ្សព្វផ្សាយវប្បធម៌ខ្មែរនៅឯក្រៅប្រទេស។
គួរជម្រាបថា អតីតតារាសម្ដែងជើងចាស់ យស បូវណ្ណៈ សព្វថ្ងៃ គឺជាទីប្រឹក្សាក្រសួងវប្បធម៌ និងវិចិត្រសិល្បៈ និងជាប្រធានសមាគម វប្បធម៌និងវិចិត្រសិល្បៈខ្មែរ នៅរដ្ឋកាលីហ្វ័រញ៉ា សហរដ្ឋអាមេរិក។ រីឯភរិយា គឺលោកជំទាវ លី ស៊ីថាវី គឺប្រធានសិល្បៈវប្បធម៌ខ្មែរ ផ្នែករបាំបុរាណនៅទីក្រុងឡុងប៊ិច៕
