កាលពីថ្ងៃទី ០៩ ខែមករា ឆ្នាំ ២០២៤ កន្លងទៅនេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបង្ហាញសេចក្តីប្រកាសព័ត៌មានរបស់អ្នកនាំពាក្យនៃអយ្យការអមសាលាដំបូងរាជធានីភ្នំពេញ ស្តីពី ការចោទប្រកាន់អ្នកបើកបររថយន្តបង្កគ្រោះថ្នាក់ចរាចរណ៍ បណ្តាលឱ្យតារាចម្រៀងរ៉េបម្នាក់ស្លាប់ នៅចំណុចផ្លូវ ៦០ ម៉ែត្រ ខណ្ឌមានជ័យ។
ក្នុងសេចក្តីប្រកាសបានរៀបរាប់ថា៖ «អ្នកនាំពាក្យនៃអយ្យការអមសាលាដំបូងរាជធានីភ្នំពេញ សូមជម្រាបជូនដល់សាធារណជនមេត្តាជ្រាបថា៖ កាលពីថ្ងៃទី ០៦ ខែ មករា ឆ្នាំ ២០២៥ វេលាម៉ោង ០១ និង ៣០ នាទី មានករណីគ្រោះថ្នាក់ចរាចរណ៍មួយកើតឡើង នៅចំណុចមុខច្រកចូលបុរីប៉េងហួត លើផ្លូវ ៦០ម៉ែត្រ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ រវាងរថយន្តមួយគ្រឿងម៉ាក LEXUS RX-300 ពណ៌ស ផ្លាកលេខ ខេមរភូមិន្ទ 09 2.2477 ជាមួយនឹងម៉ូតូមួយគ្រឿង ម៉ាក HONDA CRF ពណ៌ខ្មៅ ផ្លាកលេខ បាត់ដំបង 1AL-9616 បណ្តាលឱ្យអ្នកបើកបរម៉ូតូឈ្មោះ ដាវិឌ ឫទ្ធិរុទ្រ ភេទប្រុស អាយុ ២៤ ឆ្នាំ ស្លាប់បាត់បង់ជីវិតភ្លាមៗនៅកន្លែងកើតហេតុ»។
ផ្អែកតាមការសន្និដ្ឋាន របស់មន្ត្រីនគរបាល ចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញបញ្ជាក់ថា ករណីខាងលើនេះ កើតឡើងដោយសារ អ្នកបើកបររថយន្តបើកបត់ឆ្វេងឆ្លងផ្លូវមិនគោរពសិទ្ធិយានផ្លូវត្រង់ ចំណែកអ្នកបើកបរម៉ូតូបើកបរក្នុងល្បឿនលឿន។
ក្នុងនោះ ក្រោយពីបានសាកសួរ និង ពិនិត្យផ្ទៀតផ្ទាត់ភស្តុតាងក្នុងសំណុំរឿង តំណាងអយ្យការសម្រេចចោទប្រកាន់ លើអ្នកបើកបររថយន្តឈ្មោះ ណឹម ណាង ភេទប្រុស កើតឆ្នាំ ១៩៨៩ (ឃាត់ខ្លួន) ពីបទ «បើកបរបង្កគ្រោះថ្នាក់ ចរាចរណ៍បណ្តាលឱ្យស្លាប់អ្នកដទៃ» តាមបទប្បញ្ញត្តិមាត្រា ៨៥ នៃច្បាប់ស្តីពីចរាចរណ៍ផ្លូវគោក និង បានបញ្ជូនសំណុំរឿងនេះ ទៅចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី។
យ៉ាងណាមិញ ក្រោយសេចក្តីប្រកាសព័ត៌មានរបស់អ្នកនាំពាក្យនៃអយ្យការអមសាលាដំបូងរាជធានីភ្នំពេញបានចេញហើយ បណ្ដាលឱ្យមានការចែករំលែក និង ប្រតិកម្មយ៉ាងខ្លាំងពីសំណាក់មហាជន ជាពិសេស ក្រុមគ្រួសារ និង មិត្តភក្តិរបស់លោក RuthKo ដោយគេបានឃើញតារាចម្រៀងរ៉េប KingChi និង លោក ទេព ពិសិដ្ឋ បានលើកឡើងពីស្លាកលេខឡានបង្កបទល្មើសគឺឡានម៉ា LEXUS RX330. មានស្លាកលេខ ខេមរៈភូមិន្ទ 2-4771 រីឯក្នុងសេចក្តីប្រកាសបែរជាឡានម៉ាក LEXUS RX300 និងស្លាកលេខ 09 2.2477. ទៅវិញ។
ក្រោយផ្ទុះការចែករំលែកពីចំណុចមិនប្រក្រតីខាងលើនោះហើយ ពេលនេះអយ្យការអមសាលាដំបូងរាជធានីភ្នំពេញ បានប្តូរសេចក្តីប្រកាសថ្មី និង បានកែតម្រូវម៉ាកឡានទៅជា LEXUS RX330. មានស្លាកលេខ ខេមរៈភូមិន្ទ 2-4771 វិញហើយ៕
