ថ្មីៗនេះ តារាប្រុស Sean Jindachot បាននាំភរិយាសំណព្វចិត្តឡើងកម្មវិធីសម្ភាសជាលើកដំបូង ហើយលោកក៏បានឆ្លៀតទម្លាយរឿងគួរឱ្យរន្ធត់ខណៈទៅក្រេបទឹកឃ្មុំក្រោយពីរៀបការ ដែលប៊ិះនឹងអស់ជីវិតទាំងគូ។
ក្នុងនោះ Sean បានឱ្យដឹងថា ក្រោយពីរៀបការរួច លោកក៏មានគម្រោងនាំភរិយាទៅក្រេបទឹកឃ្មុំនៅឯហ្លួងព្រះបាង ប្រទេសឡាវ។ ខណៈកំពុងតែបើកឡានចូលទៅដល់ទឹកដីប្រទេសឡាវ ក៏ស្រាប់តែធុំក្លិនឈ្ងៀមយ៉ាងចម្លែក ចំណែកភរិយាលោកក៏បានរត់ចេញទៅមើល ក៏ឃើញថាមានអណ្តាតភ្លើងកំពុងផ្ទុះពព្រៀកចេញពីក្រោមឡាន។
ក្នុងនោះ ភរិយារបស់លោកពិតជាតក់ស្លុតណាស់ ហើយក៏បានស្រែកប្រញាប់ឱ្យលោករត់ចេញពីឡាន។ ក្រោយពីលោកចេញពីឡានបានប្រមាណ ៧ ទៅ ៨ វិនាទី ស្រាប់តែឡានក៏ផ្ទុះឆេះតែម្តង បើសិនជាពេលនោះភរិយាមិនបានប្រញាប់ហៅលោកចេញមកទេ លោកប្រាកដជាស្លាប់បាត់ហើយ។ កាលនោះភរិយាលោករកកលចង់យំ ព្រោះតែស្តាយរបស់នៅលើឡាន តែលោកក៏លួងលោមថាជារបស់ក្រៅខ្លួន ប៉ុន្តែក៏ខ្លួនឯងក៏លួចស្តាយដែរ ព្រោះចិញ្ចៀនពេជ្ររៀបការក៏នៅក្នុងនោះ ព្រមទាំងរបស់មានតម្លៃជាច្រើនទៀត៕
ប្រភព៖ TNN
