កាលពីថ្ងៃទី ១៤ ខែកុម្ភៈ ឆ្នាំ ២០២៥ នេះ ក្រសួងវប្បធម៌ និង វិចិត្រសិល្បៈ បានចេញសេចក្តីណែនាំ ស្តីពីការតែងនិពន្ធខ្លឹមសារចម្រៀង ការច្រៀង និង សិល្បៈកម្សាន្តនានា ដែលមានអត្ថន័យប្រាសចាកពីក្រមសីលធម៌ និង ប៉ះពាល់ដល់សេចក្តីថ្លៃថ្នូរសង្គម។
ដោយឡែក តាមខ្លឹមសារនៃសេចក្តីណែនាំទាំងមូលរបស់ក្រសួងវប្បធម៌ និង វិចិត្រសិល្បៈ មហាជន និង សិល្បករ សិល្បការិនីជាច្រើនបានលើកឡើងថា សេចក្តីណែនាំនេះ អាចនឹងសំដៅទៅកាន់ការផលិតបទចម្រៀងបែប Hip-Hop ច្រើន ក៏ព្រោះបទចម្រៀងរ៉េបរមែងមានបារ៉ូលមួយចំនួនមិនសមរម្យ ពោលគឺភាគច្រើនក្នុងបទចម្រៀងរ៉េបបែបឌឺដងតែម្តង។ ក្នុងនោះ ក៏មានការបញ្ចេញមតិ និង វែកញែកជាបន្តបន្ទាប់ផងដែរ។
យ៉ាងណាមិញ មកដល់ថ្ងៃទី ២០ ខែកុម្ភៈ ឆ្នាំ ២០២៥ កន្លងទៅ លោក ឡេង សុវណ្ណតារា ដែលមានឈ្មោះក្នុងសិល្បៈថា ខ្មែរ ១ ជីវិត បានចេញមកបង្ហោះសារ បញ្ចេញមតិ បន្ទាប់ពីក្រសួងវប្បធម៌ចេញសេចក្តីណែនាំបានប៉ុន្មានថ្ងៃ។
សារនោះដែរ លោក ខ្មែរ ១ ជីវិត បានរៀបរាប់ថា៖ «បំបាត់ចោលបទចម្រៀងរ៉េបចោលក៏ល្អដែរ! ខ្ញុំសង្ឃឹមថា សិល្បៈចម្រៀងខ្មែរនឹងត្រលប់ទៅកាន់សម័យកាលបទចម្លងពីគេវិញ យ៉ាងហោចណាស់ស្រួលផលិត ម៉ា (មួយ) ឆ្នាំ ២០ អាល់ប៉ុមក៏បានដែរ»៕
