ពិតជារឿងមួយដ៏គួរឱ្យរំជួលចិត្ត និង គួរឱ្យសរសើរ ដែលមាននារីជាអ្នកចម្រៀងជនជាតិប្រេស៊ីលម្នាក់ បានប្រាប់ឱ្យគេឈប់ដុតកាំជ្រួច ព្រោះតែអាណិតដល់សត្វឆ្កែដែលមកអង្គុយមើលខនសឺតរបស់នាង។
តារាចម្រៀងរូបនេះមានឈ្មោះថា Taty Girl ក្នុងនោះខណៈធ្វើការសម្តែងនៅលើឆាក នាងក៏ឃើញមានឆ្កែមួយក្បាលបានមកអង្គុយមើលនាងច្រៀងនៅមុខឆាកធ្វើមុខភ្លឹះៗគួរឱ្យស្រឡាញ់។ ដោយសារតែអាណិតសត្វឆ្កែនោះភ្លាម នាងក៏បានប្រកាសប្រាប់អ្នកគាំទ្ររបស់នាងថា នាងនឹងមិនដុតកាំជ្រួចឡើយ ព្រោះខ្លាចឆ្កែដែលអង្គុយមើលនាងនេះមានការភិតភ័យ នាងចង់ឱ្យវាបានអង្គុយមើលដោយស្ងប់ចិត្ត។
យ៉ាងណាមិញ ការសម្រេចចិត្តរបស់នាង បានធ្វើឱ្យអ្នកគាំទ្រនាំគ្នាហ៊ោ និង ទះដៃសរសើរ ហើយក៏មានអ្នកខ្លះទៀតសុំឱ្យនាងយកឆ្កែនេះទៅចិញ្ចឹម ដែលនាងក៏មានចិត្តចង់យកវាទៅចិញ្ចឹមដែរ តែក្រោយមកម្ចាស់វាក៏ចេញមុខមក ទើបធ្វើឱ្យនាងមិនអាចយកវាទៅចិញ្ចឹមបានឡើយ៕
ប្រភព៖ Khaosod
