បើគិតមកពេលនេះ រយៈពេលប្រមាណជាង ៣ ទសវត្សរ៍ មកហើយ ដែលតារាចម្រៀងជើងចាស់ លោក សុះ ម៉ាច បានបន្តឈរជើងលើវិថីសិល្បៈដូចដើម បើទោះជាបច្ចុប្បន្ន លោកមានវ័យជ្រេបន្តិចមែន។
ជាការពិត បើទោះជាអាយុកាន់តែកើន តែសមត្ថភាពសិល្បៈ និង ទឹកដមសំឡេងរបស់តារាចម្រៀងជើងចាស់ សុះ ម៉ាច នៅតែពីរោះស្រទន់ដូចដើម រហូតធ្វើឱ្យសិស្សប្អូន និង កូនសិស្សជំនាន់ក្រោយចាត់ទុកថាជា Legend ទៀតផង។
យ៉ាងណាមិញ ថ្មីៗនេះ លោក សុះ ម៉ាច បានបង្ហោះសំណេរយ៉ាងមានន័យរៀបរាប់ពីជីវិតតស៊ូតាំងពីមិនទាន់ចូលសិល្បៈ និង រហូតបានចូលសិល្បៈ មានកេរ្តិ៍ឈ្មោះបោះសំឡេង។ ម្យ៉ាងវិញទៀត លោក សុះ ម៉ាច បានឱ្យដឹងថា លោកបន្តឈរជើងលើសិល្បៈមកដល់បច្ចុប្បន្ន ព្រោះតែសិល្បៈនេះហើយ ធ្វើឱ្យលោកមានថ្ងៃនេះ។
លោក សុះ ម៉ាច បានរៀបរាប់ថា៖ «ជ្រកក្រោមដំបូលស្បូវ ធ្វើឱ្យខ្ញុំនឹកទៅឆ្នាំ ១៩៨៧ រស់នៅក្នុងខ្ទមស្បូវជញ្ជាំងស្លឹកត្នោតផ្ទាល់ដីពីរនាក់ម្តាយកម្សត់ក្នុងដីគេ។ រៀនតាំងពីអនុវិទ្យាល័យជ្រោយចង្វារ រហូតដល់វិទ្យាល័យឫស្សីកែវ ជាមួយចង្កៀងប្រេងកាត និង ភ្លើងទៀន ផ្ញើខ្លួនដោយសារមិត្តភក្តិទៅសាលា ។ ឆ្នាំ ១៩៩០ ច្រៀងបណ្តើររៀនបណ្តើរ រហូតទិញបានកង់ជិះតស៊ូសិក្សាដរាបបានសញ្ញាបត្របាក់ឌុប។ ១៩៩១-៩២ ដោយសារសិល្បៈចម្រៀង និង សម្តែងនេះហើយទើបខ្ញុំមានថ្ងៃនេះ ហើយក៏ជាហេតុផលដែលខ្ញុំមិនចាកចោលសិល្បៈ ក៏ព្រោះតែស្រឡាញ់ និង ដឹងគុណសិល្បៈនេះឯង។ មានផ្ទះថ្ម មិនភ្លេចផ្ទះស្បូវ មានម៉ូតូឡានជិះ មិនភ្លេចពេលដើរតាមផ្លូវទៅសាលា»៕
