ទើបតែចេញមិនបានប៉ុន្មាននៅលើ Netflix ភាពយន្តបែបគំនូរជីវចល ឬ Animate រឿង K-Pop Demon Hunters បានកំពុងផ្ទុះខ្លាំង រហូតឡើងលំដាប់លេខ ១ ជាសកល។ ក្រៅពីអ្នកទស្សនាជាប់ចិត្តនឹងក្រុមនារី HUNTR/X ហើយនោះ ក្រុមបុរស Saja Boys ក៏ទទួលបានប្រជាប្រិយភាពមិនធម្មតាផងដែរ។ នៅពីក្រោយតួអង្គ Animate នៃក្រុម Saja Boys យើងសូមបង្ហាញមុខអ្នកបញ្ចូលសំឡេងតួអង្គម្នាក់ៗ ដែលក្រុមនេះមានសមាជិកចំនួន ៥ គឺ មេក្រុម Jinu, Abbs, Romance, Baby និង Mystery។
១. តួអង្គ Jinu បញ្ចូលសំឡេងដោយ Ahn Hyo-seop និង ច្រៀងដោយ Andrew Choi
Ahn Hyo-seop ជាអ្នកបញ្ចូលសំឡេងតួអង្គ Jinu។ លោកមានអាជីពជាតារាសម្ដែង និង ជាតារាចម្រៀង សញ្ជាតិកាណាដា-កូរ៉េ។ លោកទទួលបានឱកាសបញ្ចូលសំឡេងលើកដំបូងក្នុងរឿង KPop Demon Hunters នេះតែម្តង។ កន្លងមក លោកធ្លាប់សម្ដែងជាតួឯកក្នុងរឿងភាគជាច្រើនរួមមាន Abyss, Dr. Romantic, Lovers of the Red Sky និង A Time Called You។
ខណៈពេលដែល Ahn Hyo-seop ជាអ្នកបញ្ចូលសំឡេង ទន្ទឹមគ្នានេះលោក Andrew Choi គឺជាអ្នកច្រៀងសម្រាប់តួឯក Jinu ផងដែរ។ Andrew Choi ធ្លាប់ឈ្នះលេខ ៣ ក្នុងកម្មវិធី K-pop Star Season 2 របស់ SBS។ ក្រៅពីផលិតចម្រៀងផ្ទាល់ខ្លួន លោកក៏បាននិពន្ធចម្រៀងសម្រាប់ក្រុមចម្រៀងកូរ៉េល្បីៗដូចជា SHINee និង EXO ជាដើម។
២. តួអង្គ Mystery បញ្ចូលសំឡេងដោយ Alan Lee និង ច្រៀងដោយ Kevin Woo
តារាសម្តែង Alan Lee ជាអ្នកបញ្ចូលសំឡេងតួអង្គ Mystery ដែលមានសក់ពណ៌ស្វាយ។ លោកធ្លាប់បញ្ចូលសំឡេងឱ្យភាពយន្តគំនូរជីវចលជាច្រើន ក្នុងនោះរួមមាន Past Lives, Solo Leveling, The First Slam Dunk, One Piece និង រឿងជាច្រើនទៀត។
ចំណែកអ្នកច្រៀងសម្រាប់តួអង្គ Mystery វិញ គឺ តារាចម្រៀង K-pop Kevin Woo។ ដំណើរក្នុងវិស័យសិល្បៈ ដំបូងឡើយលោកបង្ហាញខ្លួនជាសមាជិកក្រុមចម្រៀង XING នៅឆ្នាំ ២០០៦។ ពីរឆ្នាំបន្ទាប់មក លោកបានចាកចេញពីក្រុមនេះ ហើយក្លាយជាសមាជិកក្រុម U-KISS នៅឆ្នាំ ២០០៨។ បន្ទាប់ពីក្រុម U-KISS លោកបានធ្វើជាតារាចម្រៀងទោលវិញនៅក្នុងឆ្នាំ ២០១៨ និង ចុងក្រោយនៅឆ្នាំ ២០២៤ លោកបានសម្តែងរឿងខ្លីមួយចំណងជើង Seoul Switch។
៣. តួអង្គ Romance បញ្ចូលសំឡេងដោយ Joel Kim Booster និង ច្រៀងដោយ samUIL Lee
អ្នកបញ្ចូលសំឡេងឱ្យតួអង្គប្រុសសក់ពណ៌ផ្កាឈូក Romance គឺ តារាសម្តែង Joel Kim Booster ជនជាតិអាមេរិក។ ក្រៅពីអាជីពសម្តែង លោកក៏ជាតារាកំប្លែង ផលិតករ និង អ្នកនិពន្ធ ដែលមានសមត្ថភាពពហុជំនាញខាងវិស័យកម្សាន្ត ដែលបានសហការផលិត និង សរសេររឿង Big Mouth និង រឿងThe Other Two។ កន្លងមក លោកធ្លាប់សម្តែងរឿងដូចជា Shrill, Search Party និង Sunnyside ។ សម្រាប់រឿង KPop Demon Hunters លោកក៏បានបញ្ចូលសំឡេងឱ្យតួអង្គមួយចំនួនទៀតផងដែរ។
ដោយឡែក សម្រាប់អ្នកច្រៀងឱ្យតួអង្គ Romance វិញ គឺ samUIL Lee។ នៅក្នុងអាជីព លោកធ្វើការជាមួយសិល្បករ K-pop ជាច្រើនរួមមាន Seventeen, RIIZE, Peniel of BTOB និង NCT Dream ។
៤. តួអង្គ Abby បញ្ចូលសំឡេងដោយ Sungwon Cho និង ច្រៀងដោយ Neckwav
អ្នកបញ្ចូលសំឡេងឱ្យតួអង្គ Abby ឬហៅ Abs គឺជា YouTuber និង ជាអ្នកបញ្ចូលសំឡេងអាជីព លោក Sungwon Cho។ លោកធ្លាប់បានបញ្ចូលសំឡេងភាពយន្តគំនូរជីវចលជាច្រើន មានដូចជារឿង Craig of the Creek, One Piece និង Sakamoto Days ។
ចំណែក អ្នកច្រៀងសម្រាប់តួអង្គ Abby គឺ Neckwav ដែលមានអាជីពជាអ្នកចម្រៀង អ្នកនិពន្ធ និង ជាអ្នកនិពន្ធទំនុកច្រៀង ដែលមានមូលដ្ឋាននៅទីក្រុងសេអ៊ូល ប្រទេសកូរ៉េខាងត្បូង។
៥. តួអង្គ Baby បញ្ចូលសំឡេងច្រៀងដោយ Danny Chung
តួអង្គ Baby មិនមានស្គ្រីបនិយាយនៅក្នុងរឿងនោះទេ មានតែច្រៀងប៉ុណ្ណោះ។ ហើយអ្នកបញ្ចូលសំឡេងច្រៀងគឺ Danny Chung ជាតារាចម្រៀងរ៉េបជនជាតិអាមេរិក និង ជាអ្នកនិពន្ធបទចម្រៀង ដែលស្ថិតក្រោម THEBLACKLABEL។ កន្លងមក លោកបាននិពន្ធបទចម្រៀងសម្រាប់សិល្បករល្បីៗផ្សេងៗដូចជា ក្រុម BLACKPINK, CL, និង Somi ៕
ប្រភព៖ Prestige HK
