ដូចមហាជនបានជ្រាបមកហើយ មហោស្រព «បុណ្យភូមិ» នឹងរៀបចំកម្មវិធីការលេងល្បែងប្រជាប្រិយខ្មែរ សប្បាយៗ ស្លៀកក្បិន ក្រាលកន្ទេល មើលល្ខោន ដើម្បីអបអរសាទរឱកាសបុណ្យចូលឆ្នាំប្រពៃណីខ្មែរ ដែលខិតជិតកៀកមកដល់។ ក្នុងនោះ ឆ្នាំ ២០២៥ នេះ មហោស្រព «បុណ្យភូមិ» បានឈានមកដល់ឆ្នាំទី ១២ ហើយ។
ការត្រលប់មកវិញនាឆ្នាំនេះដែរ មហោស្រព «បុណ្យភូមិ» នឹងរៀបចំចំនួន ២ លើក ដោយលើកទីមួយរៀបចំនៅថ្ងៃទី ០៥ ដល់ ថ្ងៃទី ០៦ ខែមេសា ឆ្នាំ ២០២៥ នៅផ្សារទំនើប ជីបម៉ុង ២៧១ មេហ្គាម៉ល។ លើកទីពីររៀបចំនៅថ្ងៃទី ១១ ដល់ថ្ងៃទី ១២ ខែមេសា ឆ្នាំ ២០២៥ នៅវត្ត ស្វាយអណ្តែត។
ក្នុងនោះដែរ មហោស្រព «បុណ្យភូមិ» លើកសប្តាហ៍ ១ និង សប្តាហ៍ទី ២ នឹងមានការរៀបចំកម្មវិធីជាច្រើនរួមមាន ការលេងល្បែងប្រជាប្រិយនៅភូមិកម្សាន្ត ដូចជា បង្វិលកងផ្សងគូរ ឬផ្សងសុខសិរីឆ្នាំទាំង ១២, វាយក្អមប្រជាប្រិយមហាសំណាង, ទាញព្រ័ត្របុរាណមានជ័យ, សិក្ខាសាលាធ្វើគោមផ្កាយចូលឆ្នាំ, បត់ផ្កា និង ធ្វើប្រទីប, បត់រូបសត្វ, ការលេងល្បែងប្រជាប្រិយខ្មែរជាច្រើនទៀត។ លើសពីនោះ ក៏មានការក្រាលកន្ទេលមើលល្ខោននៅបុណ្យភូមិ ក្រោមប្រធានបទ «សម្បត្តិបេតិភណ្ឌអរូបីដែលត្រូវការការពារ ជាបន្ទាន់»។
អ្វីដែលកាន់តែសប្បាយរីករាយ ជាងនេះទៅទៀតនោះ នាពេលរាត្រីនៃមហោស្រព «បុណ្យភូមិ» នឹងមានការស្លៀកក្បិន ក្រាលកន្ទេលមើលល្ខោនទាំងអស់គ្នា ដោយមានការសម្តែងពីក្រុមសិល្ប: ជាក្រុមនៅសល់មួយក្រុមចុងក្រោយនៅក្នុងប្រទេសកម្ពុជា ដែលត្រូវការពារ និង អញ្ជើញចូលរួមសម្តែងពី ទម្រង់សិល្ប:របស់ខ្លួនដែលមានដូចជា៖ ក្រុម «ល្ខោនយីកេអ្នកភូមិនិពេជ្រ ខេត្តកំពង់ធំ», ក្រុម «ល្ខោនបុរាណ វត្តកៀនស្វាយក្រៅ», ក្រុម «ល្ខោនខោលវត្តស្វាយអណ្តែត» និង ក្រុម «ល្ខោនពោលស្រី»។ ក្រៅពីនោះ ក៏មានការប្រគំតន្រ្តីសម័យ ដែលមានតារាចម្រៀងល្បីប្រចាំប្រទេសកម្ពុជាចូលរួមកម្សាន្ត ទៀតផង៕
