ថ្មីៗនេះ អ្នកលេងបណ្តាញសង្គមហ្វេសប៊ុក និង អ្នកគាំទ្រ ព្រមទាំងមិត្តក្នុងសិល្បៈ បានបង្ហាញការចាប់អារម្មណ៍នឹងដំណឹងមួយរបស់តារាចម្រៀង លោក ណាន វីសារ ដែលបានប្រកាសនឹងរៀបចំបង្កើតមូលនិធិជួយដល់កងទ័ពជួរមុខកម្ពុជា។
ក្នុងនោះ មូលនិធិរបស់ លោក ណាន វីសារ បានធ្វើឱ្យមហាជនចាប់អារម្មណ៍កាន់តែខ្លាំងនោះ ដោយប្រុសសង្ហារូបនេះ នឹងធ្វើកម្មវិធីតាមរយៈការជិះម៉ូតូច្រៀងពីភ្នំពេញ ទៅកាន់ខេត្តព្រះវិហារ ដោយឆ្លងកាត់ ៨ ខេត្ត និង ២២ ស្រុក តាមបណ្តោយផ្លូវជាតិលេខ ៥។
ជាក់ស្តែង តាមការឱ្យដឹងពីលោក ណាន វីសារ បានរៀបរាប់ថា៖ «ខ្ញុំកំពុងចាប់ផ្តើមដំណើរមួយ ដោយជិះម៉ូតូច្រៀងពីភ្នំពេញទៅព្រះវិហារ ឆ្លងកាត់ ៨ ខេត្ត និង ២២ ស្រុក (ខ្ញុំនឹងច្រៀងតាមស្រុកនីមួយៗ) តាមផ្លូវជាតិលេខ ៥ ដើម្បីបង្កើតមូលនិធិសម្រាប់កងទ័ពជួរមុខកម្ពុជា»។
គួរជម្រាបថា ដំណើរនៃការជិះម៉ូតូច្រៀងរបស់លោក ណាន វីសារ ពីភ្នំពេញ ឆ្ពោះទៅកាន់ខេត្តព្រះវិហារ នឹងចាប់ផ្តើមពីថ្ងៃទី ០៤ ខែតុលា ឆ្នាំ ២០២៥ រហូតដល់ថ្ងៃទី ១៣ ខែតុលា ឆ្នាំ ២០២៥ ខាងមុខនេះ។ នេះបើតាមកាលវិភាគលោក ណាន វីសារ បានបង្ហោះឡើងលើផេកផ្លូវការរបស់លោក៕
