ជាដំណឹងល្អមួយសម្រាប់បងប្អូនដែលមានបំណងចង់ចូលទស្សនាស្ថានទូតបារំាងប្រចាំកម្ពុជា នៅថ្ងៃទី ៤ ខែតុលា ឆ្នាំ ២០២៥ ខាងមុខ ស្ថានទូតបារំាងប្រចាំកម្ពុជា នឹងបើកទ្វារទទួលសាធារណជន ចូលទស្សនាដោយសេរី ចាប់ពីម៉ោង ៨ ព្រឹក ដល់ម៉ោង ៤ រសៀល ក្នុងឱកាសទិវាបេតិកភណ្ឌ។
ព្រឹត្តិការណ៍នេះដែរ នឹងអនុញ្ញាតឱ្យអ្នកទស្សនាស្វែងយល់ពីសំណង់អគារនានា ដែលពោរពេញដោយប្រវត្តិសាស្រ្ត ជាពិសេសចូលកម្សាន្តនៅក្នុងឧទ្យានស្ថានទូតទំហំជិត ៥ ហិកតា ដែលជាលំហបៃតងធំជាងគេមួយនៅភ្នំពេញ ហើយក៏ជាទីកន្លែងមនោរម្យមួយ សម្រាប់ស្រូបខ្យល់អាកាសបរិសុទ្ធនៅកណ្តាលរាជធានី។ ឧទ្យាននេះមានប្រព័ន្ធអេកូឡូហ្ស៊ីជីវៈចម្រុះ ជាមួយដើមឈើប្រមាណ ២០០ ដើម សិ្ថតក្នុង ៥០ ប្រភេទខុសៗគ្នា និង ពពួកសត្វចម្រុះជាង ២៥០ ប្រភេទ ក្នុងនោះមានថនិកសត្វ សត្វស្លាប ល្មូន ថលជលិកសត្វ និង សត្វល្អិតផ្សេងៗ ដែលត្រូវបានចុះក្នុងបញ្ជីសារពើភ័ណ្ឌលម្អិតកាលពីពេលថ្មីៗនេះ។ ទិវានេះ អនុញ្ញាតឱ្យសាធារណជនចូលទៅទស្សនាស្វែងយល់ អំពីទីកន្លែងនានាដែលជាធម្មតាត្រូវបានបិទមិនឱ្យចូលទស្សនា។
ការទស្សនាស្ថានទូតបារាំង ធ្វើឡើងដោយមិនគិតថ្លៃ និង ពុំចាំបាច់ចុះឈ្មោះជាមុន ប៉ុន្តែចំនួនអ្នកទស្សនាអាចនឹងមានច្រើន ជាពិសេសនៅពេលព្រឹកដែលតម្រូវឱ្យមានការឈរតម្រង់ជួរ។ ក្នុងនោះផងដែរ ដោយសារហេតុផលសន្តិសុខ ដូច្នេះកាបូបធំៗ និង សម្ភារៈដែលអាចបង្កគ្រោះថ្នាក់ គឺមិនអនុញ្ញាតឱ្យយកចូលស្ថានទូតទេ។ ស្ថានទូតបារាំងរក្សាសិទ្ធិក្នុងការបន្ថយម៉ោងទស្សនា ក្នុងករណីមានភ្លៀងធ្លាក់ខ្លាំង ឬខ្យល់បោកបក់ខ្លាំង។ បន្ទាប់ពីទិវានេះ ឧទ្យានស្ថានទូតនឹងបើកជូនសាធារណជនចូលទស្សនាម្តងទៀត គឺនៅថ្ងៃទី ២២ ខែវិច្ឆិកា ឆ្នាំ ២០២៥ ក្នុងឱកាសនៃការរៀបចំពិព័រណ៍ផ្សារបារាំង៕
