មិនស្តាយទេ! ឌួង ហ្សូរីម៉ា ប្អូនស្រី ឌួង ហ្សូរីដា មិនបង្អង់សម្រេចទម្លាក់ស្លាកយីហោហាងកាហ្វេប្រ៊េនទិញសិទ្ធិពីថៃចោលហើយ

ក្រោយកម្ពុជាទទួលរងពីការឈ្លានពានរបស់ថៃ ពេលនេះលើបណ្ដាញសង្គមមហាជនកម្ពុជាបានបន្តការរួបរួមគ្នាដើម្បីប្រទេសជាតិក្នុងនាមជាកូនខ្មែរតាមរយៈសកម្មភាពផ្សេងៗ ជាពិសេសបង្ហាញការស្នេហាជាតិដោយជួយលើកស្ទួយនូវផលិតផលក្នុងស្រុក ដែលផលិតដោយកូនខ្មែរ។

ទាក់ទងនឹងការលើកស្ទួយនូវផលិតផលក្នុងស្រុក មហាជនកម្ពុជាទូទាំងប្រទេសក៏កំពុងធ្វើការពហិកាមិនប្រើប្រាស់ផលិតផលរបស់ថៃបន្តទៀត ដែលមានការចែករំលែកវែកញែកលើហាងម៉ាកយីហោដែលទិញសិទ្ធិនាំចូលពីប្រទេសថៃ ឱ្យឈប់នាំចូលបន្តទៀតផងដែរ។

ស្របពេលនេះដែរ ក្រឡេកមើលលើហ្វេសប៊ុករបស់តារាស្រី ឌួង ហ្សូរីម៉ា ត្រូវជាប្អូនស្រីរបស់ពិធីការិនី ឌួង ហ្សូរីដា ក៏ជាម្ចាស់អាជីវកម្មម៉ាកយីហោទិញសិទ្ធិពីថៃដែរ ដោយពេលនេះនាងបានប្រកាសផ្អាកអាជីវកម្មទាំងស្រុងដោយទម្លាក់ស្លាកយីហោហាងកាហ្វេរបស់ថៃចោល និង កំពុងរៀបចំផ្លាស់ប្ដូរយីហោរថ្មីមានឈ្មោះហាងកាហ្វេខ្មែរ និង ជាផលិតផលរបស់កូនខ្មែរសុទ្ធផងដែរ។

ក្នុងនោះ កញ្ញា ឌួង ហ្សូរីដា និង ប្អូនស្រី បានបង្ហោះរៀបរាប់ថា ៖ «យើងខ្ញុំនឹងទម្លាក់ស្លាកចាស់ (Amazon 6A)ចោល ឆាប់ៗនេះនឹងដំឡើងស្លាកថ្មីដែលជា brand កូនខ្មែរ គ្រាប់កាហ្វេខ្មែរ 100% រង់ចាំបន្តិចហាងយើងខ្ញុំកំពុងធ្វើការហើយ»។ «សូមទុកពេលឱ្យប្អូនៗ និង បងប្រុសខ្ញុំ គាត់ធ្វើការផ្លាស់ប្តូរ និង រៀបចំឯកសារការងារទៅតាមផ្លូវច្បាប់ ព្រោះការផ្លាស់ប្តូររបស់យើងមិនត្រឹមតែម៉ាកយីហោរបស់សៀមទេ គឺគ្រប់យ៉ាងត្រូវតែប្រើផលិតផលខ្មែរ និង ជៀសឱ្យផុតពីផលិតផលសៀមចង្រៃឱ្យអស់…!»៕