ជឿជាក់ថា មានមហាជនមួយចំនួន ច្បាស់ជានៅចាំនៅឡើយនូវពិធីករដ៏ល្បី គឺលោក ហែម បូរិទ្ធ ហៅ ឌីជេ ឡាយអិន ដោយកាលពីអំឡុងខែមិថុនា ឆ្នាំ ២០២៣ កន្លងទៅ លោកបានចេញពីពន្ធនាគារវិញហើយ ក្រោយត្រូវបានចាប់ខ្លួនកាលពីអំឡុងចុងឆ្នាំ ២០១៨ ពាក់ព័ន្ធសង្ស័យករណីជួញដូរគ្រឿងញៀន និង រក្សាទុកអាវុធខុសច្បាប់។
យ៉ាងណាក៏ដោយ ក្រោយភ្លៀងមេឃស្រឡះ បន្ទាប់ពីបានចេញពីពន្ធនាគារ ឌីជេ ឡាយអិន បានសាងកេរ្តិ៍ឈ្មោះ និង កិត្តិយសជាថ្មី ក្នុងនាមជាពលរដ្ឋល្អ ដោយលោកប្រឹងប្រែងធ្វើការសុចរិតដើម្បីចិញ្ចឹមជីវិតដូចពលរដ្ឋទូទៅ ដោយបច្ចុប្បន្ន លោកក៏ជាបុគ្គលិកនៅក្នុងក្រុមហ៊ុនរបស់លោក ឌួង ឆាយ ទៀតផង។
ងាកត្រឡប់ក្រោយបន្តិច មុននឹងជាប់ពន្ធនាគារ ឌីជេ ឡាយអិន ក៏បានជួបរឿងខកចិត្តកាលពីអំឡុងឆ្នាំ ២០១៤ ដោយអតីតភរិយារបស់លោកបានចុះចោល និង យកកូនប្រុសទាំង ៣ ទៅជាមួយ ខណៈព័ត៌មានបានឱ្យថា ភរិយារបស់លោកមានអ្នកថ្មី។ ក្នុងនោះ នៅដើមឆ្នាំ ២០១៥ ឌីជេ ឡាអិន និង អតីតភរិយាត្រូវតុលាការ សម្រេចឱ្យផ្តាច់សង្វាសពីគ្នាជាផ្លូវការហើយ និង ចែកទ្រព្យសម្បត្តិពាក់កណ្តាលម្នាក់ ចំណែកកូនត្រូវអតីតភរិយារបស់លោកទទួលបានសិទ្ធិចិញ្ចឹម។
យ៉ាងណាមិញ ស្រាប់តែថ្មីៗនេះ ឌីជេ ឡាយអិន បានបង្ហោះសារទទូចសុំចិត្តអតីតភរិយាឱ្យលោកបានជួបកូនប្រុសទាំង ៣ ផង ដោយលោកបានរៀបរាប់ថា៖ «ខ្ញុំមិនអាចទប់អារម្មណ៍នេះ តទៅទៀតបានទេ។ សូម្បីសត្វតោ សត្វខ្លាកាចសាហាវ ឬវាមានចិត្តតិរច្ឆានយ៉ាងណា ក៏ពួកវានៅតែមានសេចក្តីស្រឡាញ់ និង ភាពទន់ភ្លន់ ចំពោះកូនៗរបស់ពួកវាដែរ។ ខ្ញុំចង់និយាយប្រាប់ថា ខ្ញុំនឹកកូនៗខ្លាំងណាស់! សូមផ្ដល់ដំណឹង សុខទុក្ខរបស់កូនៗប្រុសទាំង ៣ ឱ្យខ្ញុំបានដឹងផង។ ខ្ញុំចង់ដឹង ចង់ឃើញ ចង់ជួបកូនប្រុសទាំង ៣ របស់ខ្ញុំតែប៉ុណ្ណោះ។ សារមួយនេះ ខ្ញុំសូមជម្រាបជូន ដល់អ្នកម៉ាក់របស់កូនៗទាំង ៣ ឱ្យបានជ្រាបថា ខ្ញុំសូមស្នើសុំចិត្តអ្នកម៉ាក់ ហើយខ្ញុំកំពុងធ្វើការស្នើសុំនេះ គឺក្នុងនាមជាឪពុករបស់កូនទាំង ៣ ដែរ ។ តើមាននរណាខ្លះ យល់ពីអារម្មណ៍ទឹកចិត្តឪពុកនឹកកូនៗទេ? ។ ខ្ញុំសូមបញ្ជាក់ថា ខ្ញុំគ្មានគំនិត ឬបំណងអាក្រក់ ក្នុងន័យទុច្ចរិត អវិជ្ជមាន ឬធ្វើឱ្យប៉ះពាល់សេចក្តីសុខ នរណាមួយឡើយ។ ខ្ញុំសូមស្នើសុំ ដោយសន្តិភាព។ សារមួយនេះសង្ឃឹមថា អ្នកម៉ាក់របស់កូនប្រុសទាំង ៣ បានទទួល និង ឃើញហើយមានចិត្តសណ្តោសប្រណី ក្ដីមេត្តា អធ្យាស្រ័យ ដោយក្ដីអនុគ្រោះ»៕
