ឌីជេ ក្តិប ប្រកាសអាចក្រោកឈរឡើងវិញ ក្រោយឆក់បានតំណែងសំខាន់ស្មើ វណ្ណដា ក្នុងកម្មវិធីប្រឡងចម្រៀងរ៉េបថ្មី

ជាការពិតណាស់ អ្នកគាំទ្រនិយមតាមដានពីជីវិតការងារសិល្បៈរបស់ ឌីជេ ក្តិប ច្បាស់ជាបានជ្រាបហើយថា បន្ទាប់ពីវិលត្រឡប់មកកាន់សិល្បៈជាថ្មីរយៈពេលចុងក្រោយនេះ លោកកាន់តែទទួលបានប្រជាប្រិយភាព និង មានទីផ្សារការងារសិល្បៈជាហូរហែ។

យ៉ាងណាមិញ ថ្មីៗនេះ ឌីជេ ក្តិប បានធ្វើឱ្យមហាជនរំភើបចិត្តយ៉ាងខ្លាំងក្នុងនាមជាអ្នកគាំទ្រ ដែលបានឃើញ Idol បានបង្ហាញវត្តមានធ្វើជា គណៈកម្មការក្នុងកម្មវិធីប្រកួតចម្រៀងរ៉េបថ្មីសន្លាង The Next Level: Rapstar របស់ផលិតកម្មបារមី ជាមួយនឹងតារាចម្រៀងរ៉េប វណ្ណដា។

ក្នុងនោះដែរ ក្រោយពីបានក្លាយទៅជា គណៈកម្មការក្នុងកម្មវិធីប្រកួតចម្រៀងរ៉េបនេះហើយ ឌីជេ ក្តិប ក៏បានបង្ហោះសំណេរយ៉ាងវែងអន្លាយថា៖ «រំភើបណាស់! រីករាយណាស់! ត្រេកអរណាស់ ដែលបានខិតខំតស៊ូ រហូតអាចធ្វើដំណើរមកដល់ចំណុចចាប់ផ្ដើមនេះ។ សូមអរគុណ! ដល់មនុស្សល្អគ្រប់គ្នា ដែលធ្លាប់បានជួយខ្ញុំកន្លងមកគ្រប់រូបភាពទាំងអស់។ អរគុណ សម្រាប់ការលើកទឹកចិត្ត! អរគុណសម្រាប់ការជំរុញទឹកចិត្ត! ទីបំផុតខ្ញុំធ្វើបានហើយ ខ្ញុំមិនធ្វើឱ្យបងប្អូនខកចិត្តឡើយ (អរគុណណាស់)។

ពិសេស! សូមអរគុណដល់បារមី អរគុណដល់ប្អូន Mann Vannda សម្រាប់ការឱ្យតម្លៃ ការផ្ដល់ឱកាសការងារ ការលើកស្ទួយ ដើម្បីភាពរីកចម្រើននៅក្នុងវិស័យហីបហប់ខ្មែរឱ្យកាន់តែល្អអស្ចារ្យនៅលើឆាកអន្តរជាតិបន្តទៅមុខទៀត។ ខ្ញុំពិតជាអរគុណណាស់! អរគុណ ដែលមិនបំភ្លេច ឌីជេ ក្ដិប «ក្មេងស្រលាញ់ការតែងនិពន្ធ» ម្នាក់នេះ។

ចុងក្រោយ! សូមអរគុណខ្លួនឯង ដែលបានប្រឹងប្រែងផ្ដល់ស្នាមញញឹម ជូនទៅលោកប៉ា ដែលបានឃ្លាតទៅឆ្ងាយ, អ្នកម្ដាយ ដែលកំពុងគេងញញឹមនៅផ្ទះ, កូនៗ ដែលមិនទាន់មានឱកាសជួប, មិត្តភក្តិ បងប្អូន ដែលកំពុងតែសាទរពីចម្ងាយ ក៏ដូចជាអ្នកមានគុណទាំងអស់ដែលបានជួយខ្ញុំ។ ទីបំផុត! ខ្ញុំអាចក្រោកឈរវិញបានហើយ»៕