ជាការពិតណាស់ មហាជនបានជ្រាបមកហើយពីកេរ្តិ៍ឈ្មោះតារាចម្រៀងរ៉េប វណ្ណដា ដែលមិនត្រឹមតែមានឈ្មោះល្បីសុសសាយនៅក្នុងប្រទេសកម្ពុជានោះទេ លោកក៏ទទួលបានប្រជាប្រិយភាពខ្លាំងនៅក្រៅប្រទេសផងដែរ។
តារាចម្រៀងរ៉េបប្រចាំផលិតកម្មបារមីរូបនេះ ក៏ពាំនាំឈ្មោះកម្ពុជាឡើងទៅលើឆាកអន្តរជាតិជាច្រើន ដោយឆាកធំបំផុតចុងក្រោយនោះ គឺកម្មវិធីកីឡាអូឡាំពិក ២០២៤ នៅទីក្រុងប៉ារីស។ លើសពីនោះ នៅក្នុងឆ្នាំ ២០២៥ នេះ វណ្ណដា ក៏នឹងត្រៀមបង្ហាញវត្តមានលើឆាកប្រគំតន្ត្រីនៅឯសហរដ្ឋអាមេរិកជាថ្មីម្តងទៀតផងដែរ។
ងាកទៅកាន់ការផលិតចម្រៀងវិញ វណ្ណដា មិនត្រឹមតែបានសហការណ៍នឹងតារាចម្រៀងរ៉េបក្នុងស្រុកទេ គឺលោកក៏ធ្លាប់បានច្រៀងចម្រៀងរួមគ្នានឹងតារាចម្រៀងរ៉េបបរទេសជាច្រើន រួមមានប្រទេសថៃ ប្រទេសជប៉ុន និង ប្រទេសវៀតណាមជាដើម។
ថ្មីៗនេះ វណ្ណដា បានបង្ហាញមោទកភាពជាថ្មីសម្រាប់កម្ពុជា ក្នុងនាមជាតារាចម្រៀងរ៉េបវ័យក្មេង ដោយបានបង្ហាញវត្តមានក្នុងបទចម្រៀងរួមគ្នាជាមួយកំពូលៗតារាចម្រៀងរ៉េបតំបន់អាស៊ីមានចំណងជើងថា «ASIAN STATE OF MIND» រួមមានវត្តមានតារាចម្រៀងរ៉េបជប៉ុន Awich, តារាចម្រៀងរ៉េបកូរ៉េ Jay Park, តារាចម្រៀងរ៉េបកូរ៉េ-ឥណ្ឌា KR$NA និង តារាចម្រៀងរ៉េបចិន Masiwei។
ក្នុងនោះ មហាជនកាន់តែចាប់អារម្មណ៍ខ្លាំង ខណៈបានឃើញ Jay Park បានចុច Follow វណ្ណដា នៅលើ Instagram ដោយនេះចាត់ទុកថាលោក វណ្ណដា ជាតារាចម្រៀងរ៉េបកម្ពុជាទី ១ ដែលត្រូវបានកំពូលតារាចម្រៀងរ៉េបកូរ៉េ Jay Park បាន follow។ គួរជម្រាបថា មិនមែនមានតែ Jay Park នោះទេ ដែលបានចុច Follow វណ្ណដា គឺនៅមានតារាបរទេសជាច្រើនទៀតផងដែរ៕
