មកដល់ពេលនេះ ភាពចម្រូងចម្រាស់រវាងប្រទេសកម្ពុជាយើង និង ប្រទេសថៃ នៅតែបន្តមានភាពតានតឹងមិនទាន់រកដំដោះស្រាយសមស្របណាមួយនៅឡើយ ខណៈនៅយប់រំលងអាធ្រាត្រឈានថ្ងៃទី ១២ មិថុនា ឈានចូលថ្ងៃទី ១៣ មិថុនា ឆ្នាំ ២០២៥ នេះ ស្ថានភាពរវាងប្រទេសទាំងពីរក៏កាន់តែតឹងតែង ខណៈកម្ពុជាបានប្រកាសឈប់ចាក់រឿងថៃនៅគ្រប់បណ្ដាទូរទស្សន៍ទាំងអស់ ហើយសម្ដេចតេជោ ហ៊ុន សែន ក៏ប្រកាសនឹងបិទឈប់ទិញទំនិញថៃមកប្រើប្រាស់នៅកម្ពុជា បើសិនជាភាគីថៃនៅតែបន្តបិទច្រកព្រំដែនជាឯកតោភាគី។
ស្របពេលដែលជម្លោះព្រំដែនរវាងកម្ពុជា-ថៃ នៅតែមិនទាន់ធូរស្រាលនៅឡើយ ប្រជាពលរដ្ឋខ្មែរទាំងអស់មានទឹកចិត្តមោះមុតក្នុងការរស់នៅជាឯករាជ្យ ដោយមិនពឹងផ្អែកលើការប្រើប្រាស់ទំនិញ អគ្គិសនី ឬប្រព័ន្ធអ៊ីនធឺណេតពីថៃឡើយ ជាពិសេសប្រជាពលរដ្ឋខ្មែរដែលកំពុងធ្វើការជាពលករនៅប្រទេសថៃ ឱ្យត្រឡប់មករកការងារធ្វើនៅទឹកដីកម្ពុជាយើងវិញ។
ក្នុងនោះ គេក៏បានឃើញឧកញ៉ា សឹង ចាតវិជ្ជា បានបើកឱកាសដល់ពលករខ្មែរនៅថៃ ដែលមានជំនាញផ្នែកផលិតសាប៊ូ ហើយចង់ត្រឡប់មកធ្វើការនៅប្រទេសកម្ពុជាយើងវិញ អាចដាក់ពាក្យចូលធ្វើការនៅក្រុមហ៊ុនលោកបាន ដែលមានទីតាំងនៅភ្នំពេញ។
ឧកញ៉ា សឹង ចាតវិជ្ជា បានជូនដំណឹងនៅថ្ងៃទី ១៣ ខែមិថុនា ឆ្នាំ ២០២៥ នេះ តាមរយៈគណនីហ្វេសប៊ុកផេកផ្លូវការថា ៖ «ខ្ញុំត្រូវការបងប្អូនពលករប្រទេសថៃ ដែលមានជំនាញផលិតសាប៊ូកក់សក់ សាប៊ូដុសខ្លួន និងសាប៊ូសម្អាតផ្ទះ មកធ្វើការនៅរោងចក្ររបស់ខ្ញុំ សូមទាក់ទង Tel 077941099»៕
