មហាជន ដែលតាមដានពីអាការរបស់កុមារា ឆលី ដែលដុះដុំសាច់ក្នុងខួរក្បាល ព្រមទាំងទទួលបានការវះកាត់យ៉ាងជោគជ័យទៅហើយ កាលពី ២ ខែកន្លះមុន ច្បាស់ជាបានដឹងដំណឹងមកហើយថា ដុំសាច់ខួរក្បាលនោះបានដុះឡើងវិញ។ លើសពីនោះ អ្វីកាន់តែរន្ធត់ គ្រូពេទ្យប្រចាំរបស់ ឆលី បញ្ជាក់ថា ឆលី មិនអាចបន្តការព្យាបាលទៀតបានទេ បានត្រឹមប្រើប្រាស់ថ្នាំដើម្បីរក្សាពេលវេលារស់នៅជាមួយគ្រួសារ និង បងប្អូនមួយរយៈពេលប៉ុណ្ណោះ។
ក្នុងនោះដែរ ក្រោយទទួលដំណឹងរបស់កូនប្រុសដ៏អព័ភ្វហើយនោះ ក្រុមគ្រួសាររបស់ ឆលី គឺមិនបោះបង់ក្តីសង្ឃឹមឡើយ ដោយប៉ាម៉ាក់របស់ ឆលី បានបញ្ជូនកូនមកកាន់ប្រទេសកម្ពុជាវិញ កាលពីថ្ងៃទី ២០ ខែមិថុនា ឆ្នាំ ២០២៥ វិញ ដើម្បីរត់ការឯកសារយក ឆលី ទៅព្យាបាលនៅសហរដ្ឋអាមេរិកវិញ។
យ៉ាងណាមិញ នៅថ្ងៃទី ២៣ ខែមិថុនា ឆ្នាំ ២០២៥ នេះ តាមរយៈផេកផ្លូវការរបស់ ឆលី បានឱ្យដឹងថា ឆលី នឹងមិនទៅព្យាបាលនៅសហរដ្ឋអាមេរិកនោះឡើយ ព្រោះតែការរត់ឯកសារមានរយៈពេលយូរ ហើយ ឆលី មិនអាចទ្រាំនូវស្ថានភាពសុខភាពបាន ប៉ុន្តែទោះជាយ៉ាងណា ក៏មានដំណឹងល្អវិញ ដោយ ឆលី នឹងត្រៀមទៅព្យាបាលនៅប្រទេសម៉ាឡេស៊ីវិញ។
តាមរយៈផេក ឆលី បានឱ្យដឹងថា៖ «គោរពជម្រាបសួរ អ៊ំ ពូ មីង ពុកម៉ែ បងប្អូន ទាំងអស់គ្នា ចង់បញ្ជាក់ជម្រាបប្រាប់បងប្អូនថា ឆលី មិនបានទៅព្យាបាលនៅអាមេរិកទេ ព្រោះដោយសាររយៈពេលយូរនៅក្នុងការរត់ឯកសារ ដូច្នេះហើយ ឆលី មិនអាចទ្រាំទ្របានត្រូវទទួលការព្យាបាលឆាប់រហ័សតាមដែលអាចធ្វើទៅបាន។ ឥឡូវនេះមានដំណឹងដ៏ល្អមួយ ឆលី បានទទួលដំណឹងថា នឹងទទួលការព្យាបាលនៅប្រទេសម៉ាឡេស៊ី ទីក្រុងកូឡាឡាំពួរ ក្នុងរយៈពេលឆាប់ៗខាងមុខនេះ។ សូមអរគុណ ទឹកចិត្ត ពុកម៉ែ អ៊ំ ពូ មីង បងប្អូនទាំងអស់គ្នា ដែលស្រឡាញ់ចូលចិត្ត ឆលី និង តែងតែលើកទឹកចិត្តគាត់។ សង្ឃឹមថាឆលីនឹងបានធូរស្រាលល្អប្រសើរ»៕
