លោក ធីម សៀងហៃ ជាកូនអ្នកខេត្តកោះកុង សព្វថ្ងៃរស់នៅប្រទេសបារាំង ប្រកបរបរជាគ្រូបង្វឹកប្រដាល់គុនខ្មែរនៅក្លឹប The Temple នាទីក្រុង Bordeaux។ ជាកូនកំព្រាម្ដាយចាកឆ្ងាយចំណាកស្រុក លោកបានខិតខំយ៉ាងខ្លាំងដើម្បីជាតិកម្ពុជា ដោយរមែងផ្សព្វផ្សាយគុនខ្មែរឱ្យល្បីរន្ទឺនៅប្រទេសបារាំង ក៏ដូចជាទៅកាន់ពិភពលោក។ យ៉ាងណាមិញ ទម្រាំល្បីដូចសព្វថ្ងៃ លោកបានតស៊ូប្រកួតតាំងពីមិនបានលុយមួយរៀល រហូតសហព័ន្ធធំប្រទេសបារាំងមានការទទួលស្គាល់។
ជាក់ស្តែង តាមការបង្ហោះថ្មីៗនៅលើគណនីហ្វេសប៊ុក លោក ធីម សៀងហៃ បានសរសេររៀបរាប់រម្លឹកថា៖ «កន្លងផុតជាច្រើនឆ្នាំ ជ័យជម្នះខ្សែក្រវាត់លំដាប់ប្រទេសបារាំងលើកដំបូងជូនប្រទេសជាតិខ្មែរ ហើយបងប្អូនជឿឬអត់ ប្រសិនជាខ្ញុំប្រាប់ថាខ្សែក្រវាត់នេះ ខ្ញុំតស៊ូឡើងប្រកួតមិនបានលុយសូម្បីតែមួយរៀល ហើយថែមទាំងអស់ថ្លៃស្នាក់នៅ និង ហូបចុកដោយខ្លួនឯងថែមទៀត!។
គេអាចថាខ្ញុំល្ងង់ក៏ថាបាន ឈឺសាច់ហើយមិនបានអី្វទៀត តែដើម្បីអី គឺចង់ឱ្យខ្លួនក្នុងនាមជាខ្មែរ ជាប់ឈ្មោះនៅហ្គូហ្កលរ៉ាន់ឃីងស្ថាប័នរបស់គេ ព្រោះដឹងថា មិនទាន់មានខ្មែរជាប់ឈ្មោះនៅស្ថាប័នមួយនេះ និង ចង់ឱ្យគេស្គាល់គុនខ្មែរ ។ ជាធម្មតា ស្ថាប័ននេះ ក្នុងនាមខ្ញុំជាខ្មែរចំណាកស្រុក គេមិនអាចឱ្យចូលរួមលេងនោះទេ ដូចបងប្អូនខ្មែរនៅប្រទេសបារាំបានដឹងហើយ (គឺឆេមពានដឺហ្វ្រង់) តែដោយសារការយោគយល់ ក្នុងនាមខ្ញុំជាអ្នកបង្ហាត់គុនខ្មែរផ្ទាល់នៅបារាំង ទើបគេអនុញ្ញាតឱ្យចូលរួម តែមិនបានមួយរៀលនោះទេ ដូចគេប្រាប់ជាមុន ពេលប្រកួតចប់។ គិតៗទៅថាខ្លួនឯង ល្ងង់ក៏ថាបាន កម្សត់ក៏ថាបាន ឆ្លាតក៏ថាបាន ដើម្បីអី គឺដើម្បីខ្លួនឯង និង ជាតិខ្មែរ តែគ្មានអ្នកយល់ពីការខិតខំរបស់ខ្ញុំនោះទេ ។
បន្ទាប់មកសហព័ន្ធធំប្រទេសបារាំង ក៏បានទទួលស្គាល់ និង ឱ្យចូលរួមលេងខ្សែក្រវាត់ស្ថាប័នធំរបស់គេ ជាបន្តបន្ទាប់ក្នុងនាមខ្ញុំជាខ្មែរ ចាប់ពីខ្សែរវាត់ទីពីរ រហូតដល់ទីបួន គឺខ្ញុំទទួលបានថវិកាធម្មតាដោយសារការទទួលស្គាល់ ហើយពួកគេ និង កីឡាករផ្សេងៗរបស់បារាំង ក៏ភ្ញាក់ផ្អើល ដូចជាមិនរីករាយ ប៉ុន្តែដោយពួកគេអាណិត និង ចូលចិត្តខ្ញុំជាខ្មែរ ទើបពួកគេមិនបង្ហោះសារអ្វីផ្ដេសផ្ដាស ព្រោះតាមច្បាប់ ខ្ញុំមិនអាចចូលរួមប្រជែងជើងឯកនៅស្ថាប័នប្រទេសបារាំងបាននោះទេ ព្រោះនាមជាអ្នកចំណាកស្រុក រហូតមកដល់ពេលនេះ ធ្វើឱ្យខ្ញុំទទួលបានពីស្ថាប័នធំរបស់បារាំងចំនួនបី និង វើលគុនខ្មែរចំនួនមួយ»។
គួរឱ្យដឹងដែរថា មុនចំណាកស្រុកទៅប្រទេសបារាំង លោក ធីម សៀងហៃ ទទួលបានចំណេះប្រដាល់តាមរយៈការបង្រៀនពីឪពុកគឺ លោក ទិត្យ ផល្លា ដែលជាអតីតកីឡាករតៃក្វាន់ដូទសវត្សរ៍ឆ្នាំ ១៩៨០ និង ជាអតីតកីឡាករប្រដាល់គុនខ្មែរទសវត្សរ៍ទី ២០។ លើសពីនេះ លោកក៏បានរៀនពីឪពុកមា ដែលជាអ្នកប្រដាល់គុនខ្មែរដ៏ល្បីឈ្មោះម្នាក់ នៅអំឡុងទសវត្សរ៍ឆ្នាំ ២០១០ គឺ លោក ទិត្យ សុវណ្ណគិរី ផងដែរ៕
