នៅថ្ងៃទី ៣ ខែតុលា ឆ្នាំ ២០២៥ នេះ សារព័ត៌មាន Khaosod បានរាយការណ៍ពីករណីដើមអំពិលអាយុជាង ១០០ ឆ្នាំមួយដើម បានរលំសង្កត់ផ្ទះមួយខ្នង បណ្តាលឱ្យរបួសមួយគ្រួសារ ក្រោយពីរងការបោកបក់ពីព្យុះកំណាចកាលពីយប់កន្លងទៅ។
ហេតុការណ៍ខាងលើបានកើតឡើងនៅឃុំក្រាក់ជីវ ស្រុកផាស៊ី ខេត្តអយុធ្យា នៅវេលាម៉ោងប្រមាណជា ៣ ទៀបភ្លឺ ឈានចូលថ្ងៃទី០៣ ខែតុលា ឆ្នាំ ២០២៥ នេះ។ តាមបុរសជាម្ចាស់ផ្ទះបានរៀបរាប់ឱ្យដឹងថា នៅពេលកើតហេតុមនុស្សនៅក្នុងគ្រួសារសុទ្ធតែដេកលក់ទាំងអស់ ហើយស្រាប់តែមានភ្លៀងធ្លាក់ លាយឡំនឹងផ្គររន្ទះយ៉ាងខ្លះ មិនយូរប៉ុន្មានស្រាប់តែមានអារម្មណ៍ថាផ្ទះទាំងមូលរង្គើខ្លាំងដូចរញ្ជួយដី ខ្លួនប្រញាប់រត់ទៅមើលកូនស្រី តែផ្ទះក៏ស្រាប់តែរលំមកតែម្តង។
តាមព័ត៌មានបានឱ្យដឹងទៀតថា សមាជិកគ្រួសារក្នុងនេះទាំង ៤ នាក់សុទ្ធតែរបួសទាំងអស់ រីឯផ្ទះក៏បានខូចខាតទាំងស្រុង ហើយឡាន ១ គ្រឿង ព្រមទាំងម៉ូតូ ២ គ្រឿងទៀត ក៏បានខូចខាតដូចគ្នា។ ពេលនេះមេឃុំ និងអាជ្ញាធរកំពុងតែចុះទៅជួយអន្តរាគមន៍ ដោយវាស់វែងការខូចខាត និងបើកឱ្យជនរងគ្រោះដាក់ពាក្យសុំជំនួយពីរដ្ឋដែលពាក់ព័ន្ធផងដែរ៕
ប្រភព៖ Khaosod
