ថ្មីៗនេះ បុរសជនជាតិចិនម្នាក់ បានចែករំលែកពីប្រវត្តិស្នេហារបស់ខ្លួន ដែលកើតចេញពីរឿងប៉ះគ្នាតាមដងផ្លូវជាមួយនឹងនារីម្នាក់ រហូតដល់លង់ស្នេហ៍នាង ហើយមានសំណាងបានប្តូរពីគូករណី ក្លាយទៅជាគូជីវិតយ៉ាងផ្អែមល្ហែម។
បុរសរូបនេះបានរៀបរាប់ឱ្យដឹងថា កាលពីខែកុម្ភៈ ឆ្នាំ ២០២៣ កន្លងទៅ លោកបានបើកឡានប៉ះនារីវ័យ ២១ ឆ្នាំម្នាក់នៅតាមផ្លូវ ដែលបណ្តាលឱ្យនាងបាក់ឆ្អឹងដងកាំបិត។ ដោយសារតែអាណិត និង ទំនួលខុសត្រូវ បុរសរូបនេះក៏បាននៅជួយមើលថែនាងនៅពេទ្យអស់រយៈពេលជាច្រើនថ្ងៃ ដោយបានប្រើពេលវេលាជាច្រើនជាមួយគ្នា រហូតដល់កើតអារម្មណ៍ស្នេហារៀងៗខ្លួន។
យ៉ាងណាមិញ ទាំងគូបានយល់ចិត្តគ្នា ហើយយល់ព្រមប្តូរឋានៈពីគូករណីទៅជាគូជីវិត ដោយបានសម្រចចិត្តចូលរោងការជាមួយគ្នានៅក្នុងឆ្នាំ ២០២៤ ហើយបានរួមរស់យ៉ាងមានក្តីសុខ។ ដោយឡែក នៅក្នុងខែមិថុនា ឆ្នាំ ២០២៥ ខាងមុខនេះ ប្តីប្រពន្ធទាំងគូនឹងទទួលបានសមាជិកថ្មីបន្ថែមទៀត ដែលនឹងធ្វើឱ្យគ្រួសារកាន់តែពេញលេញមានន័យថែមទៀត៕
ប្រភព៖ Khaosod
