បើតាមធម្មជាតិរបស់សត្វមូស វាត្រូវការសីតុណ្ហភាពក្តៅ និង ត្រូវការទឹកដើម្បីបង្កាត់ពូជ តែយ៉ាងណាមិញនៅប្រទេសត្រជាក់មួយចំនួនដូចជា ហ្គ្រីនឡង់ ដាណឺម៉ាក និង ហ្វាំងឡង់ ក៏មានមូសនៅដែរ ក្នុងនោះមានតែប្រទេសអ៊ីស្លង់ប៉ុណ្ណោះ ដែលគ្មានមូស ព្រោះតែមានអាកាសធាតុប្លែកប្រទេសដទៃ។
ប្រទេសអ៊ីស្លង់ ជាប្រទេសដែលត្រជាក់ខ្លាំង ហើយមានរដូវក្តៅខ្លីបំផុត ដែលសីតុណ្ហភាពមធ្យមនៅរដូវក្តៅរបស់ប្រទេសអ៊ីស្លង់ គឺត្រឹម ១០ អង្សាប៉ុណ្ណោះ ចំណែកទឹកទន្លេ និង បឹងទាំងឡាយក៏តែងតែកកជាប្រចាំ ជាមូលហេតុដែលធ្វើឱ្យការបង្កាត់ពូជរបស់មូសមិនអំណោយផលឡើយ ពោលគឺវាពិបាករស់នៅក្នុងអាកាសធាតុបែបនេះណាស់។
លើសពីនេះទៅទៀត ក្រៅពីមានអាកាសធាតុត្រជាក់ខ្លាំងហើយ ប្រទេសអ៊ីស្លង់ក៏មានភ្នំភ្លើង និង ផ្ទាំងទឹកកកជាច្រើន ដែលធ្វើឱ្យរឹតតែគ្មានកន្លែងដាក់ពងទៀតតែម្តង។ យ៉ាងណាមិញ ការដែលប្រទេសគ្មានមូស បានធ្វើឱ្យប្រជាជនអ៊ីស្លង់ចៀសផុតពីជំងឺគ្រុនឈាម និង គ្រុនចាញ់ ម្យ៉ាងវិញទៀតទីនោះក៏ក្លាយជាកន្លែងទេសចរណ៍គួរឱ្យចាប់អារម្មណ៍ ព្រោះអ្នកទេសចរអាចធ្វើសកម្មភាពជាច្រើននៅក្រៅផ្ទះ ដោយមិនខ្វល់ពីការរំខានពីសត្វមូស៕
ប្រភព៖ Sanook
