មិនមែនគ្រប់មនុស្សសុទ្ធតែចូលចិត្តស្នេហានោះទេ តែក្នុងនោះក៏មានមនុស្សមួយចំនួន ដែលមានជំងឺ Philophobia ដែលជាលក្ខណៈម្យ៉ាង ធ្វើឱ្យមនុស្សម្នាក់មានការភ័យខ្លាច ឬការថប់បារម្ភចំពោះស្នេហា ឬទំនាក់ទំនងរបស់ខ្លួនជាមួយនរណាម្នាក់ រួមទាំងការមិនបើកចិត្តទទួលយកស្នេហា ឬទំនាក់ទំនងថ្មីណាមួយ។
អ្នកដែលមាន philophobia អាចមានមូលហេតុពីបទពិសោធស្នេហារបស់ពួកគេនៅក្នុងអតីតកាល ដែលមានដូចជាការដែលធ្លាប់ត្រូវគេបោះបង់ ការក្បត់ចិត្ត ការបំពានផ្លូវអារម្មណ៍។ អ្នកខ្លះទៀតអាចមកពីការខ្លាចអារម្មណ៍ស្មុគស្មាញនៅក្នុងស្នេហា ខ្លាចការបែកបាក់ ឬខ្លាចការដាក់ចិត្តដាក់កាយនៅក្នុងស្នេហា រហូតទាល់តែបាត់បង់សេរីភាពរបស់ខ្លួនឯង។ អ្នកដែលមាន philophobia អាចជាមនុស្សដែលគេចពីស្នេហា ឬអាចសម្តែងជាប្រតិកម្មផ្សេងៗដូចជាការមានស្នេហាតែមួយឆាវៗ ឬអ្នកខ្លះអាចមានស្នេហាហើយ តែនៅតែមិនអាចបើកចិត្តជាមួយដៃគូបាន។
យ៉ាងណាមិញ philophobia មិនត្រូវបានគេចាត់ទុកថាជាជំងឺផ្លូវចិត្តឡើយ តែវាអាចបណ្តាលមានការពិបាកក្នុងការបង្កើតទំនាក់ទំនងនៅក្នុងសង្គម ឬអាចឱ្យបាត់បង់ឱកាសក្នុងការសាងទំនាក់ទំនងស្នេហាដែលមានន័យជាដើម៕
ប្រភព៖ AMARINTV
