កាលពីថ្ងៃទី ៧ ខែសីហា ឆ្នាំ ២០២៥ កន្លងទៅ សារព័ត៌មាន Mirror Media បានរាយការណ៍ពីករណីដាច់ស្ពានយោលនៅកន្លែងទេសចរណ៍មួយនៅក្នុងប្រទេសចិន ដែលបង្កឱ្យធ្លាក់មនុស្សស្រស់ៗ ស្លាប់អស់ ៥ នាក់ និង របួស ២៤ នាក់។
ហេតុការណ៍នេះ បានកើតឡើងកាលពីល្ងាចថ្ងៃទី ៦ ខែសីហា ឆ្នាំ ២០២៥ នៅ នៅកន្លែងទេសចរណ៍ដ៏ល្បី Xia Da តំបន់ Zhaoshu ភាគពាយ័ព្យខេត្ត Xinjiang ប្រទេសចិន។ តាមព័ត៌មានបានឱ្យដឹងថា ខ្សែដែលភ្ជាប់ស្ពានបានដាច់ ធ្វើឱ្យស្ពានផ្អៀងទៅម្ខាង ទាំងដែលកំពុងមានអ្នកទេសចរណ៍ជាច្រើនកំពុងនៅលើនោះ។ ក្នុងនោះ មានអ្នកខ្លះក៏តោងជាប់នៅលើស្ពាន ឯអ្នកខ្លះទៀតក៏បានធ្លាក់ទៅក្នុងទឹកទន្លេ អ្នកខ្លះក៏ធ្លាក់ទៅលើដី ដែលបង្កឱ្យមានការភ័យស្លន់ស្លោជ្រួលច្របល់យ៉ាងខ្លាំង។
យ៉ាងណាមិញ តាមព័ត៌មានបានឱ្យដឹងថា មានមនុស្សចំនួន ៥ នាក់ បានបាត់បង់ជីវិត និង ២៤ នាក់ទៀតបានរងរបួសនៅក្នុងហេតុការណ៍នេះ ដោយក្នុងនោះមានរបួសធ្ងន់ ២ នាក់ ក្រៅពីនេះសុទ្ធតែរបួសស្រាល។ បច្ចុប្បន្នកន្លែងទេសចរណ៍មួយនេះត្រូវបានគេបិទបណ្តោះអាសន្នសិន និង រងចាំការត្រួតពិនិត្យពីមន្រ្តីជំនាញ៕
ប្រភព៖ Kapook
