កាលពីថ្ងៃទី ២៣ ខែកញ្ញា ឆ្នាំ ២០២៥ កន្លងទៅនេះ ម្ចាស់កសិកដ្ឋានផលិតទឹកដោះគោស្រស់នៅក្នុងប្រទេសថៃ ជាង ១០០ នាក់ បាននាំគ្នាមកតវ៉ា ដោយយកទឹកដោះគោចាក់ចោលនៅមុខអង្គការមួយរបស់រដ្ឋដែលប្រមូលទិញទឹកដោះគោស្រស់ ក្រោយអង្គការនេះប្រមូលទិញហើយមិនឱ្យលុយដល់ពួកគេសរុបជាង ៦០០ លានបាត។
តាមព័ត៌មានបានឱ្យដឹងថា មនុស្សជាង ១០០ នាក់ ដែលជាអ្នកតំណាងមកពីកសិដ្ឋានផលិតទឹកដោះគោស្រស់ចំនួន ១៥ បាននាំគ្នាមកប្រឆាំងតវ៉ានៅនឹងមុខអគារការិយាល័យរបស់អង្គការលើកកម្ពស់ការចិញ្ចឹម និង ប្រមូលទឹកដោះគោនៃប្រទេសថៃ (DPO) ដោយមូលហេតុគឺអង្គការហួសកាលកំណត់លើការទូទាត់ប្រាក់ថ្លៃទឹកដោះគោដែលបានប្រមូលទិញពីកសិកដ្ឋាន។
ក្រុមអ្នកតវ៉ាបានអះអាងថា ការយឺតយ៉ាវនេះបានខុសនឹងកិច្ចសន្យា ដែលមានកំណត់ការទូទាត់ត្រឹមតែ ៤៥ ថ្ងៃ ហើយធ្វើឱ្យប៉ះពាល់ដល់ការបង្វិលប្រាក់ទៅឱ្យកម្មករទាំងឡាយដែលជាអ្នកយកទឹកដោះគោដោយផ្ទាល់។ ក្នុងនោះក្រុមអ្នកតវ៉ាបានទាមទារឱ្យអង្គការទូទាត់ប្រាក់តាមកាលកំណត់ និង ស្នើឱ្យអង្គការប្រមូលទិញទឹកដោះគោក្នុងបរិមាណដែលកំណត់ក្នុងកិច្ចសន្យា គឺ ២១២ ២៧៩ តោនក្នុងមួយថ្ងៃ ដែលឥឡូវនៅសល់ត្រឹមតែ ១០០ តោនក្នុងមួយថ្ងៃ ព្រមទាំងប្រើប្រាស់ប្រាក់បម្រុងចំនួន ៨០០ លានបាត មកជួយទិញទឹកដោះគោប្រអប់ដែលលក់មិនចេញ ព្រមទាំងសងបំណុលទាំងអស់ផងដែរ៕
ប្រភព៖ Khaosod
