និយាយដល់តារាចម្រៀងកញ្ញា វី ឌីណែត អាចចាត់ទុកជាតារាស្រីមានភាពជោគជ័យមួយរូបលើវិស័យចម្រៀងរបស់ខ្លួនកន្លងមក ដ្បិតតែបច្ចុប្បន្ននាងហាក់មិនសូវបង្ហាញស្នាដៃបទចម្រៀងថ្មីៗច្រើនដូចមុន ប៉ុន្តែតារាស្រីរូបនេះក៏នៅរក្សាបានទីផ្សារសិល្បៈដដែល តែងឃើញវត្តមានរបស់នាងលើឆាកតន្រ្តីតូចធំផ្សេងៗ។
ក្រៅពីអាជីពសិល្បៈចម្រៀង កញ្ញា វី ឌីណែត ក៏ត្រូវបានគេដឹងថានាងឆ្លៀតពេលកាន់កាប់មុខជំនួញផ្ទាល់ខ្លួនផងដែរ ព្រមទាំងឃើញនាងបង្ហាញសកម្មភាពផ្សព្វផ្សាយផលិតផលក្នុងស្រុកផ្សេងៗ។
ដោយឡែក ថ្មីៗកន្លងទៅនេះ អ្វីកាន់តែធ្វើឱ្យអ្នកគាំទ្រចាប់អារម្មណ៍ទៀតចំពោះកញ្ញា វី ឌីណែត ខណៈបានឃើញនាងបង្ហាញពីសកម្មភាពចាប់យកបទពិសោធថ្មីក្នុងការងារថ្មី ដែលនាងកំពុងចូលរៀនហ្វឹកហាត់ក្នុងជួរមន្រ្តីនរគបាលកម្ពុជា ក្នុងនាមជានិស្សិតបរិញ្ញាបត្រវិទ្យាសាស្ត្រនគរបាលមួយរូបនៅឯបណ្ឌិត្យសភានគរបាលកម្ពុជា។
បើតាមរយៈការបង្ហោះលើហ្វេសប៊ុក កញ្ញា វី ឌីណែត បានរៀបរាប់ភ្ជាប់ជាមួយរូបភាពស្នាមរបួសពេលហ្វឹកហាត់ថា ៖ «ស្គាល់ហើយ ដឹងហើយ ឮហើយ ឃើញហើយ ជួបហើយ ទោះជាយ៉ាងណានាងខ្ញុំត្រូវតែស៊ូទ្រាំបន្តទៀត….ដើម្បីការងារមួយនេះ»៕
