ឈឺចិត្តតិចអី! ស្រឡាញ់គ្នា ៥ ឆ្នាំទើបដឹងបងប៉ូលិសរូបសង្ហាបន្លំខ្លួនមកបោកក្ដីស្រឡាញ់ដើម្បីស៊ើបរឿងក្ដី

ថ្មីៗនេះ រឿងរ៉ាវបទពិសោធស្នេហារបស់ស្រ្តីម្នាក់ ត្រូវបានគេចែកចាយ ដោយនាងធ្លាប់ត្រូវប្រុសស្អាតមកបោកឱ្យស្រឡាញ់អស់ ៥ ឆ្នាំ ចុងក្រោយទើបដឹងការពិតថាគេជាប៉ូលិសបន្លំខ្លួនដើម្បីមកស៊ើបក្តីពីនាងសោះ។

រឿងរ៉ាវមួយនេះ ត្រូវបានគេចងក្រងជាភាពយន្តឯកសារមួយដែលមានឈ្មោះថា The Undercover Police Scandal: Love and Lies Exposed ដែលនិយាយអំពីស្រ្តីជាង ៦០ នាក់ ដែលត្រូវប៉ូលិសបន្លំខ្លួនមកទាក់ទងស្នេហាជាមួយ ដើម្បីស៊ើបអង្កេតក្រុមចលនាបក្សពួករបស់ពួកនាង។ ក្នុងនោះ Alison ក៏ជាស្រ្តីម្នាក់ក្នុងចំណោមនេះដែរ ដោយនាងបានឱ្យដឹងថា កាលពីជាង ២០ ឆ្នាំកន្លងទៅ នាងបានជួបមនុស្សប្រុសម្នាក់ឈ្មោះថា Mark Cassidy ដែលគេអះអាងថាខ្លួនជាជាងឈើមកពី Birkenhead ហើយនាងក៏បានទាក់ទងស្នេហាជាមួយគេអស់រយៈពេលជាង ៥ ឆ្នាំ។

យ៉ាងណាមិញ ទំនាក់ទំនងកំពុងតែទៅមុខយ៉ាងរលូនសុខៗ ស្រាប់តែ Mark ក៏ចាកចេញពីនាងទៅបាត់ដោយស្ងាត់ៗ ដែលធ្វើឱ្យនាងមានការខកចិត្ត និង ឈឺចាប់ជាខ្លាំង ព្រោះតែនាងស្រឡាញ់គេខ្លាំង ដោយមានគម្រោងនឹងសាងគ្រួសារជាមួយគេទៀត។ នាងពិតជាមិនអស់ចិត្តសោះ នាងក៏បានធ្វើការស៊ើបរឿងរបស់ Mark ទើបដឹងថា តាមពិតទៅគេគឺជាប៉ូលិសមួយរូប ដែលស្ថិតក្នុងអង្គភាព Met’s Special Demonstration Squad ដែលជាអង្គភាពសម្ងាត់របស់ទីក្រុងឡុងដ៍ ហើយគេមកទាក់ទងនាងនេះ គឺដើម្បីប្រមូលព័ត៌មានអំពីក្រុមសកម្មជនដែលមាននាងជាសមាជិកប៉ុណ្ណោះ៕

ប្រភព៖ Khaosod