នៅថ្ងៃទី ៣០ ខែកក្កដា ឆ្នាំ ២០២៥ នេះតំណាងយោធាមកពី ១៣ ប្រទេស បានចុះដល់សមរភូមិអានសេះ ខេត្តព្រះវិហារ ដើម្បីពិនិត្យផ្ទាល់នូវអានុភាពគ្រាប់កាំភ្លើងធំរបស់ថៃ បំផ្លាញរូបសំណាក ផ្សារ ផ្លូវ និង ផលប៉ះពាល់នានា ក្រោមការជួយសម្របសម្រួលពីសំណាក់មេទ័ពកម្ពុជា។
តាមរយៈជំនួបនេះ មេទ័ពកម្ពុជា បានប្រាប់អនុព័ន្ធយោធា និង មន្រ្តីទូតនានាចំនួន ១៣ ប្រទេស អំពីហេតុការណ៍មួយដ៏ឈឺចាប់បំផុត ដែលទាហានថៃបានប្រើរូមភាពចរចាសុំចាប់ដៃ និង ថតរូប តែបានបង្កប់គ្នីគ្នា និង បានចេញមកភ្ជង់ចាប់ខ្លួនទាហានកម្ពុជាចំនួន ២០ នាក់ តែក្នុងនោះបានរត់រួចម្នាក់ និង សង្ស័យស្លាប់ ២ នាក់ ក្រោយបទឈប់បាញ់ចូលជាធរមាន។ ការចាប់ខ្លួននេះ នៅពេលទាហានកម្ពុជា ដើរទៅចាប់ដៃគ្នាជាមួយទាហានថៃ នៅសមរភូមិជាំតែ។
នេះជាការរៀបរបស់មេទ័ពកម្ពុជា ដែលបានបញ្ជាក់ប្រាប់ជាព័ត៌មាន និង ប្រាប់ដល់អនុព័ន្ធយោធាទាំង ១៣ ប្រទេស ៖ «ជាក់ស្ដែងបន្ទាប់ពីដល់វេលាកំណត់បទឈប់បាញ់ គឺកងទ័ពកម្ពុជាទាំងអស់ បានបញ្ឈប់ការបាញ់ទាំងស្រុងមិនមានការតបតបង្កបញ្ហានោះឡើយ តែផ្ទុយទៅវិញនៅព្រឹកថ្ងៃទី ២៩ ខែកក្កដា វេលាម៉ោង ៥៖១៨ នាទីព្រឹក ភាគីថៃបានប្រើប្រាស់រថពាសដែកមួយគ្រឿង ជាមួយកម្លាំងថ្មើរជើងប្រមាណជាង ៣០ នាក់ បានបាញ់មកលើកម្លាំងកម្ពុជា នៅបុស្បូវជាំតែ ដោយគាត់បានបាញ់មកលើកម្ពុជា ២ គ្រាប់នូវអាវុធធុនធ្ងន់ រួចហើយក៏បានប្រើប្រាស់កម្លាំងថ្មើជើងបាញ់សំដៅមកលើកម្ពុជាលើទឹកដីកម្ពុជា។ ក្នុងនោះទ័ពកម្ពុជា មិនមានការតបតអ្វីទាំងអស់ ទើបកម្លាំងនាំគ្នាចូលក្នុងលេណដ្ឋានដើម្បីលាក់ខ្លួនធានាសុវត្ថិភាព លុះភាគីថៃឃើញកម្ពុជាមិនតបតប ក៏នៅតែបាញ់បន្តចូលមកបន្ថែមទៀត។
លុះក្រោយមក ភាគីថៃបានយកបានលេនដ្ឋានបាន ក៏បានបក់ដៃហៅកងទ័ពកម្ពុជាថាចរចាសិន ទើបទាហានកម្ពុជាបានដើរទៅចាប់ដៃគ្នាជាមួយទាហានថៃ និង ថតរូបជុំគ្នា លុះពេលដើរត្រឡប់មកវិញ ស្រាប់តែទាហានថៃភ្ជង់កាំភ្លើង និង ចាប់ខ្លួនទាហានកម្ពុជាតែម្ដង។ បើតាមការអះអាងថា របស់មេទ័ពកម្ពុជា រហូតមកទល់រសៀលថ្ងៃទី ៣០ ខែកក្កដា ឆ្នាំ២០២៥ ក្រុមទាហានថៃមិនទាន់ដោះលែងទាហានកម្ពុជានៅឡើយទេ»៕
