នៅព្រឹកថ្ងៃទី ០៤ ខែកញ្ញា ឆ្នាំ ២០២៥ នេះ ក្រសួងសុខាភិបាល បានចេញសេចក្ដីជូនដំណឹងស្តីពីការរកឃើញផលិតផលបំប៉នសុខភាព និង គ្រឿងសម្អាងមានលួចដាក់សារធាតុសកម្ម ឱសថសម័យ និង សារធាតុគីមីប្រើប្រាស់លើសកម្រិតស្តង់ដា ទៅលើគ្រឿងសម្អាង និង ផលិតផលបំប៉នសុខភាព ៣ មុខរបស់ក្រុមហ៊ុន Love Riya។
ក្រសួងសុខាភិបាល បានបញ្ជាក់ឱ្យដឹងថា កាលពីថ្ងៃទី ១៥ ខែសីហា ឆ្នាំ ២០២៥ ស្នងការដ្ឋាននគរបាលខេត្តកណ្តាល បានសហការជាមួយក្រុមការងារមន្ទីរសុខាភិបាល នៃរដ្ឋបាលខេត្តកណ្តាល និង អាជ្ញាធរពាក់ព័ន្ធ បានចុះអនុវត្តច្បាប់នៅគេហដ្ឋានរបស់លោកស្រី ឆេង ស្រីរ័ត្ន ម្ចាស់គ្រឹះស្ថាន អាហរ័ណ នីហរ័ណ ផលិតផលគ្រឿងសម្អាង ឡាហ្វ រីយ៉ា ឯ.ក ដោយបានស្រង់យកសំណាកផលិតផលបំប៉នសុខភាព ចំនួន ២ មុខ និង គ្រឿងសម្អាង ចំនួន ១២ មុខ មកវិភាគគុណភាព នៅមជ្ឈមណ្ឌលជាតិពិសោធន៍សុខាភិបាល ដែលក្នុងចំណោមនោះ មានផលិតផលបំប៉នសុខភាពចំនួន ២ មុខ និងផលិតផលគ្រឿងសម្អាងចំនួន ៣ មុខ ដែលគ្មាន លេខបញ្ជីកា ឬលេខប្រវេទន៍ពីក្រសួងសុខាភិបាល។
ក្នុងនោះ យោងតាមលទ្ធផលវិភាគគុណភាពរបស់មជ្ឈមណ្ឌលជាតិពិសោធន៍សុខាភិបាលបានបង្ហាញថា៖
– ផលិតផលបំប៉នសុខភាពឈ្មោះ LOVE RIYA ថ្នាំលេបបាត់ជាំ ដែលគ្មានលេខបញ្ជីកាពីក្រសួងសុខាភិបាល មានលួចដាក់សារធាតុសកម្ម ឱសថ Tranexamic Acid ខណៈសារធាតុឱសថ Tranexamic Acid ត្រូវបានគេប្រើប្រាស់សម្រាប់ការឃាត់ឈាម ក្រោមការត្រួតពិនិត្យរបស់វេជ្ជបណ្ឌិត ឬ គ្រូពេទ្យ។
– គ្រឿងសម្អាងចំនួន ២ មុខ គ្មានលេខប្រវេទន៍ ពីក្រសួងសុខាភិបាលឈ្មោះ Loveriya Double White Body Lotion និង Loveriya ម្សៅលាបមុខព្យាបាលមុនសាច់ មុនអង្កាម មុនខ្ទុះ មុនផ្កាស្បូន ស្នាមជាំ មានផ្ទុកសារធាតុគីមី Salicylic Acid និង បារត (Mercury) លើសកម្រិតស្តង់ដា ដែលបានកំណត់ក្នុងមគ្គទេសក៍គ្រឿងសម្អាងអាស៊ាន។ សារធាតុគីមី Salicylic Acid លើសកម្រិតស្តង់ដា បង្កផលប៉ះពាល់ដល់សុខភាព ដូចជាស្បែកស្ងួត រលាកស្បែក និង ប្រតិកម្មអាល់ឡែស៊ីស្បែក។ សារធាតុគីមីបារត (Mercury) លើសកម្រិតស្តង់ដាបង្កផលប៉ះពាល់ដល់សុខភាព ដូចជាខ្សោយតម្រងនោម មហារីកស្បែក និង ប៉ះពាល់ប្រព័ន្ធប្រសាទ។
ដូច្នេះ ដើម្បីចៀសវាងការប្រើប្រាស់ផលិតផល ដែលមានផ្ទុកសារធាតុគ្រោះថ្នាក់ ឬសារធាតុលើសកម្រិតស្តង់ដាខាងលើ ក្រសួងសុខាភិបាល ជម្រាបជូនដល់បងប្អូនប្រជាពលរដ្ឋទាំងអស់ត្រូវបញ្ឈប់ការទិញ និង ប្រើប្រាស់ផលិតផលទាំង ៣ មុខនេះជាបន្ទាន់។ ទន្ទឹមនេះដែរ សូមសាធារណជនទាំងអស់ត្រូវបញ្ឈប់ការប្រើប្រាស់ ផលិតផលបំប៉នសុខភាពគ្មានលេខបញ្ជីកា និង គ្រឿងសម្អាងគ្មានលេខប្រវេទន៍ពីក្រសួងសុខាភិបាល ដើម្បីចៀសវាងការខាតបង់ប្រាក់ និង ប៉ះពាល់ដល់សុខភាព ឬឈានដល់បាត់បង់អាយុជីវិត ដោយផលិតផលទាំងនេះ ពុំធានាបាន នូវគុណភាព សុវត្ថិភាព ស្របតាមបទដ្ឋានបច្ចេកទេសឡើយ៕
សូមអានសេចក្ដីលម្អិតបន្ថែម ៖
