បើគិតចាប់តាំងពីថ្ងៃទី ១៧ ខែកញ្ញា ឆ្នាំ ២០២៥ មកដល់ពេលនេះ រយៈពេល ១ សប្តាហ៍មកហើយ ដែលតារាចម្រៀងប្រុស លោក ជ័យ សុវ៉ាត បានចាកចេញពីប្រទេសកម្ពុជា ទៅកាន់ទៅដីប្រទេសកូរ៉េ ដើម្បីបន្តការសិក្សាថ្នាក់អនុបណ្ឌិតផ្នែកឯកទេសសើរស្បែកនៅទីនោះ។
ក្នុងនោះ ការចាកចេញទៅសិក្សានៅប្រទេសកូរ៉េនេះដែរ លោក ជ័យ សុវ៉ាត បានជាប់អាហារូបករណ៍រយៈពេល ២ ឆ្នាំ ដោយសិក្សានៅឯសកលវិទ្យាល័យ Wonkwang។
ជាការពិតណាស់ កន្លងមក លោក ជ័យ សុវ៉ាត ធ្លាប់បានធ្វើដំណើរទៅកម្សាន្ត និង បំពេញការងារនៅក្រៅប្រទេសជាច្រើនលើកច្រើនសាមកហើយ ប៉ុន្តែការចាកចេញទៅបន្តការសិក្សាលើកនេះ ហាក់ខុសប្លែកពីសព្វមួយដង ក៏ព្រោះតែលោកត្រូវឃ្លាតក្រុមគ្រួសាររយៈពេលយូរ។
ក្នុងនោះដែរ ទើបតែឃ្លាតគ្រួសារប៉ុន្មានថ្ងៃ លោក ជ័យ សុវ៉ាត បានបង្ហាញអារម្មណ៍នឹករឭកអ្នកផ្ទះរហូតសម្រក់ទឹកភ្នែកមិនខ្មាសអៀន និង លើកឡើងថា លោកស្គាល់អារម្មណ៍ឈឺចាប់នេះហើយ គ្មានអ្វីល្អជាងការរស់នៅជួបជុំក្រុមគ្រួសារទេ៕
