ថ្មីៗនេះ រង្វង់សិល្បៈថៃបានផ្ទុះការភ្ញាក់ផ្អើលជាខ្លាំង ក្រោយពីធ្លាយរឿង Due Arisara ដែលជាតារាស្រីធ្លាប់តែហាយសូរ ឥឡូវមកជំពាក់បំណុលគេជុំទិស ថែមទាំងយកគ្រឿងអលង្ការរបស់គេតម្លៃរាប់លានដុល្លារ ទៅបញ្ចាំដោយគ្មានការអនុញ្ញាត។
យ៉ាងណាមិញ ក្រោយពីរឿងរ៉ាវរបស់នាងត្រូវបានគេទម្លាយ មានមហាជនច្រើនណាស់បានរិះគន់នាងជាពាក្យពេចន៍ផ្សេងៗពេញបណ្តាញសង្គម រហូតដល់នាងស្ងាត់លែងកើត បានចេញមុខមកផុសសារទទួលកំហុសតែម្នាក់ឯង ព្រមទាំងអង្វរសុំឱ្យមហាជនកុំអូសគ្រួសាររបស់នាងមកពាក់ព័ន្ធ។ ដោយឡែក មិនយូរប៉ុន្មាន គេឃើញថានាងពិតជាមានសកម្មភាពបញ្ជាក់ពីការទទួលខុសត្រូវពិតមែន ដោយនាងបានផុសលក់របស់ប្រ៊េនៗដែលនាងមាន នៅតាមគណនី IG ដែលមានស្បែកជើងម៉ាក DIOR ALEXANDER WANG CHANEL តម្លៃរាប់ពាន់ដុល្លារ ដើម្បីយកលុយមកសងបំណុលគេវិញ។
ឃើញបែបនេះហើយ មហាជនមួយចំនួនក៏បានចូលទៅឱ្យកម្លាំងចិត្តនាងក្នុងការដើរទៅមុខ និង តស៊ូដោះបំណុលតទៅទៀត ជាពិសេសក៏មានការសរសើរនូវការទទួលខុសត្រូវរបស់នាងដែលមានចំពោះកំហុសរបស់ខ្លួនផងដែរ៕
ប្រភព៖ Khaosod
