និយាយពីតារាចម្រៀងស្រីវ័យក្មេង វីរៈ និច្ច ចាប់តាំងពីរៀបការសាងគ្រួសារជាមួយស្វាមីរូបសង្ហាច្រើនឆ្នាំមកនេះ នាងហាក់កាន់តែទទួលសុភមង្គលខ្លាំង មានស្វាមីពូកែយល់ចិត្ត ថ្នាក់ថ្នម និង ចាប់ដៃគ្នាសាងគ្រួសារយ៉ាងមានក្ដីសុខ។
លើសពីនេះ វីរៈ និច្ច និង ស្វាមី បានចាប់ដៃគ្នាកាន់កាប់ជំនួញពេញដៃ ទាំងវិស័យអនឡាញ និង របររកស៊ីផ្សេងៗយ៉ាងកាក់កប ដែលប្ដីប្រពន្ធមួយគូនេះ កំពុងរស់នៅក្នុងជីវភាពហ៊ឺហារ ជិះសុទ្ធរថយន្តទំនើប ប្រើប្រាស់របស់របរម៉ាកល្បីៗ ទៅកន្លែងប្រណីតៗថ្លៃ ចាយជីវិតបែបអភិជនទាំងវ័យក្មេង។
បើនិយាយពីមុខជំនួញការរកស៊ីរបស់តារាចម្រៀងស្រី វីរៈ និច្ច និង ស្វាមី កាលពីអំឡុងចុងឆ្នាំ ២០២៣ កន្លងទៅ ត្រូវបានគេដឹងថាប្ដីប្រពន្ធមួយគូនេះ បានចាប់ផ្ដើមកាន់កាប់ការរកស៊ីដ៏ធំមួយ គឺបានបើកភោជនីយដ្ឋានបែបរាត្រីមានឈ្មោះថា N1 Taxi Lounge នៅឯក្រុងព្រះសីហនុ និង ចាប់ផ្ដើមអាជីវកម្មអនឡាញផ្សេងៗបន្តបន្ទាប់ទៀត។
ដោយឡែក ក្រោយពីភោជនីយដ្ឋាន N1 Taxi Lounge បានដំណើរការកាក់កប ជិត ២ ឆ្នាំ មកដល់ថ្មីៗនេះ ក៏បានឃើញ វីរៈ និច្ច និង ស្វាមី បង្ហាញរូបភាពសម្ភោធទីតាំងភោជនីយដ្ឋានថ្មីមួយទៀត ដែលមានឈ្មោះថា N1 PLUS Lounge ក្នុងក្រុងព្រះសីហនុ ដោយបានចាប់ផ្ដើមដំណើរហើយដែរ។
ទន្ទឹមនឹងនោះ មហាជនអ្នកគាំទ្រ ក៏ដូចជាអ្នកសិល្បៈជាច្រើនក៏បានចូលបង្ហាញការអបអរ និង ជូនពរចំពោះតារាចម្រៀងស្រីរូបនេះ និង ស្វាមី ឱ្យកាន់តែទទួលបានសុភមង្គលជោគជ័យក្នុងជីវិតថែមទៀត៕
