ស្របពេលខ្សែភាពយន្តភាគទូរទស្សន៍ «កូនប្រសាស្រី» របស់អ្នកស្រី ពាន់ ភួងបុប្ឋា កំពុងផ្ទុះការចាប់អារម្មណ៍ជាថ្មីម្តងទៀត ឃើញថាមហាជនអ្នកគាំទ្រនិយមចូលចិត្តតាមដានខ្សែភាពយន្តភាគនេះ ក៏កំពុងផ្ទុះការចែករំលែកពេញបណ្ដាញសង្គម ព្រមទាំងចាប់អារម្មណ៍ចង់ដឹងពីតួអង្គសម្ដែងនីមួយៗក្នុងសាច់រឿង ដោយមកដល់បច្ចុប្បន្នកំពុងរស់នៅមានជីវិតឯកជនបែបណាផងដែរ។
បើក្រឡេកទៅចាប់អារម្មណ៍ជីវិតឯកជនរបស់តួអង្គបងថ្លៃស្រីរបស់តួស្រីហៅ ចែហុង ក្នុងសាច់រឿង «កូនប្រសាស្រី» ដែលមានចរិតកាចនោះវិញ ត្រូវបានគេដឹងថាជីវិតក្រៅសាច់រឿងរបស់នាង បច្ចុប្បន្នជាគ្រូបង្រៀនមួយរូប ដែលមានឈ្មោះពិតថា ចាន់ថេត។
លើសពីនេះ ក្រឡេកទៅមើលគណនីហ្វេសប៊ុកផ្ទាល់របស់តួអង្គបងថ្លៃស្រីរូបនេះ សព្វថ្ងៃអ្នកនាងមានគ្រួសារមួយយ៉ាងមានសុភមង្គល រស់នៅជាមួយសា្វមី និង កូនប្រុស ២ នាក់ ព្រមទាំងមានមុខរបរជាគ្រូបង្រៀននៅវិទ្យាល័យបាក់ទូករាជធានីភ្នំពេញ។
ជាមួយគ្នានេះដែរ អ្វីកាន់តែចាប់អារម្មណ៍ខ្លាំងពីជីវិតឯកជនក្រៅសាច់រឿងរបស់តួអង្គ ចែហុង បងថ្លៃស្រីរូបនេះទៀត ក្រោយពីបានឃើញហ្វេសប៊ុករបស់លោកជំទាវ នៅ សុនិតា បានចែករំលែកពីរឿងរ៉ាវមួយរបស់អ្នកគ្រូ ចាន់ថេត ដោយទម្លាយឱ្យដឹងថាអ្នកគ្រូ គឺជាគ្រូបង្ហាត់ផ្នែកសិល្បៈម្នាក់បង្រៀននៅវិទ្យាល័យបាក់ទូក ហើយលោកជំទាវក៏ធ្លាប់ជាកូនសិស្សទទួលបានការបង្ហាត់ផ្នែកគ្រឹះសិល្បៈពីអ្នកគ្រូរូបនេះតាំងពីថ្នាក់ទី ៧ ផងដែរ។
ការបង្ហោះចែករំលែកនោះ លោកជំទាវ នៅ សុនិតា បានរៀបរាប់ថា ៖ «អ្នកគ្រូបង្ហាត់សិល្បៈតាំងពីថ្នាក់ទី ៧ នៅវិទ្យាល័យបាក់ទូក ខ្ញុំមានគ្រឹះបាតចេញពីគាត់»៕
