មួយរយៈក្រោយ ក្រុមរាំ SPICY NAMES ទទួលបានការគាំទ្រកាន់តែខ្លាំងពីសំណាក់យុវវ័យ។ ក្រុមនេះមិនត្រឹមតែពូកែ dance cover បទចម្រៀង K-pop ប៉ុណ្ណោះទេ តែក៏រមែងបង្កើតការជួបជុំ random dance ឬរាំឆ្លាស់បទ ដើម្បីឱ្យយុវវ័យបានចូលរួមរាំលេងសប្បាយ ហើយថែមទាំងបង្កើតភាពលេចធ្លោ ធ្វើឱ្យមហាជនជាតិ និង អន្តរជាតិ ចាប់អារម្មណ៍ផងដែរ។
ជាសមិទ្ធផលមួយបន្ថែមទៀត ថ្មីៗនេះ ក្រុមរាំដែលមានសមាជិកស្រីប្រុស ៩ នាក់នេះ បានចូលរួមប្រកួតរាំនៅក្នុងកម្មវិធី CHANGWON KPOP WORLD FESTIVAL 2025 ដែលធ្វើឡើងនៅកម្ពុជា ហើយទទួលបានជ័យលាភីលេខ ១ នាំយកមោទកភាពទាំងសម្រាប់ក្រុម ក៏ដូចជាអ្នកគាំទ្រ។ ជាមួយភាពជោគជ័យ អ្នកគាំទ្រ និង មហាជនជាច្រើនបានចូលរួមសម្តែងការអបអរ ដោយបាន Like, Comment និង Share វីដេអូ ក៏ដូចជារូបភាពជាហូរហែនៅលើបណ្តាញសង្គម។
កន្លងមក ក្រុម SPICY NAMES ធ្លាប់បានចូលប្រកួតក្នុងកម្មវិធីប្រកួតរាំ 2024 𝐊-𝐏𝐎𝐏 𝐖𝐨𝐫𝐥𝐝 𝐅𝐞𝐬𝐭𝐢𝐯𝐚𝐥- Cambodia Preliminary ដោយទទួលបានជ័យលាភីលេខ ២។ កាលពីដើមឆ្នាំ ២០២៥ ក្រុមនេះធ្លាប់បានចេញទៅសម្តែងនៅទីក្រុង Harbin ដែលជាទីក្រុងទឹកកកធំបំផុតលើពិភពលោកនៅប្រទេសចិន នៅក្នុងកម្មវិធី Dream of winter global promotional campaign 2025។
ក្រុមរាំនេះតែងទទួលបានការចាប់អារម្មណ៍តាមរយៈការបង្ហាញក្បាច់រាំដ៏រស់រវើក រាំលះស្រុះគ្នាល្អ ឯសមាជិកម្នាក់ៗក៏មានភាព Unique រៀងខ្លួន និង ស្រស់ស្អាតផងដែរ។ ជាពិសេស ពួកគេបានរាំនៅក្នុងព្រឹត្តិការណ៍ប្រគំតន្ត្រីធំៗនៅកម្ពុជា ដូចជាការប្រគំតន្ត្រី THE Q – RISE OF THE QUEEN របស់តារាចម្រៀង ឱក សុគន្ធកញ្ញា និង ការប្រគំតន្រ្តីដ៏អស្ចារ្យ «ត្រីវិស័យសុវណ្ណភូមិ» ជាដើម៕
