Three Bakery គឺជាហាងនំដ៏ល្បីមួយនៅទីក្រុងភ្នំពេញ ទទួលបានការគំាទ្រខ្លាំងពីសំណាក់អ្នកចូលចិត្តនំបែបច្នៃប្រឌិត និង នំខេកប្រណីតៗ។ ជាពិសេស អតិថិជនគាំទ្រសុទ្ធតែអ្នកលំដាប់ខ្ពស់។ ភាពជោគជ័យនៅពីក្រោយហាងនំនេះ បានកើតឡើងពីការចាប់ដៃគ្នារវាងគូស្នេហ៍បុរសមួយគូ អ្នកទាំងពីរសុទ្ធតែសង្ហា និង មានភាពខ្លាំងរៀងខ្លួន។
ផ្តើមចេញពី លោក Kunmealy Kunkar ឬមានឈ្មោះហៅក្រៅ Billy លោកមានអាយុ ២៨ ឆ្នាំ ជានិស្សិតបញ្ចប់ការសិក្សាផ្នែកគណនេយ្យ និង ហិរញ្ញវត្ថុ។ ផ្តើមអាជីពដើរតាមបេះដូង លោកបានយកឯកទេសទៅលើការបង្កើតនំប៉័ងច្នៃប្រឌិតថ្មីៗ(Fusion pastry), នំខេកក្នុងឱកាសពិសេស និង នំអាពាហ៍ពិពាហ៍។ ពិតមែនទៅ ដំបូងការបោះជំហានទៅក្នុងវិស័យម្ហូបអាហារ មិនមែនជាផែនការក្នុងគម្រោងជីវិតរបស់លោកនោះទេ។ មហិច្ឆតាលើការធ្វើនំ បានកើតឡើងនៅពេលដែលលោកយកការធ្វើនំជាការកម្សាន្ត រាប់តាំងពីនំ cookies នំប៉័ង និង នំខេក ជាដើម។
Three Bakery បានចាប់ផ្តើមពីក្នុងផ្ទះបាយដ៏តូច ដែលអាចធ្វើនំសម្រាប់ភ្ញៀវម្តងបានតែ ៦ នាក់។ នៅក្នុងខែ ឧសភា ឆ្នាំ ២០២២ Billy លោកបានចាប់ដៃជាមួយគូស្នេហ៍គឺ លោក Siengta Ly ដែលមានអាយុស្របាលគ្នា ដោយបើហាងនំ Three Bakery ដំបូងនៅក្នុងតំបន់បឹងកេងកង។ មកដល់ខែ មករា ឆ្នាំ ២០២៣ អ្នកទាំងពីរបានបណ្តាក់ទុនពង្រីកសាខាមួយទៀត ស្ថិតនៅក្នុងផ្សារទំនើប ជីប ម៉ុង ២៧១ មេហ្គា ម៉ល ។
នៅក្នុងអាជីវកម្មនេះ Billy ជាអ្នកនាំមុខចម្បងទៅលើការច្នៃប្រឌិត, ដឹកនាំការអភិវឌ្ឍន៍ផលិតផល, ធ្វើការឌីហ្សាញនំខេករាប់តាំងពីការចេញខនសិប និង ជំរុញក្រុមការងារឱ្យជោគជ័យ។ ចំណែក លោក Siengta ដែលជាគូស្នេហ៍វិញ លោកមើលខុសត្រូវទៅលើការឌីហ្សាញហាង, visuals, ការវេចខ្ចប់ និង យុទ្ធសាស្ត្រម៉ាកយីហោ (branding)។ ជាមួយអាជីវកម្មរីកចម្រើនជាលំដាប់ នាពេលខាងមុខ គូស្នេហ៍ម្ចាស់ហាងនំនេះ នឹងមានគម្រោងពង្រីកបន្ថែមទៀតទៅកាន់តំបន់មានសក្តានុពលដូចជា ទួលគោក និង សែនសុខ៕
ប្រភព៖ Prestige
