នៅថ្ងៃទី ០៧ ខែសីហា ឆ្នាំ ២០២៥ នេះ តាមរយៈគណនី លោកឧកញ៉ាបណ្ឌិត ប៉ិច បូឡែន អគ្គនាយកក្រុមហ៊ុន Westline Education Group បានបញ្ជាក់ឱ្យបានដឹងថា នៅថ្ងៃទី ០៧ ខែសីហា ឆ្នាំ ២០២៥ នេះ ក្មេងស្រីដែលកំពុងផ្ទុះការចាប់អារម្មណ៍ ចេះនិយាយ ៤ ភាសា បានមកជួបលោកឧកញ៉ាបណ្ឌិត ប៉ិច បូឡែន ដោយមានការផ្ចុងផ្តើមសម្របសម្រួលរបស់លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី និង រួមដំណើរដោយលោកជំទាវ ប៉ុក ណាន់ដា ប្រធានសហព័ន្ធស្ត្រីអ្នកជំនួញកម្ពុជា។
តាមប្រភពបានឱ្យដឹងថា យោងតាមសំណូមពរបងប្អូនឱ្យជួយគាត់ ដើម្បីបានបន្តការសិក្សាបន្ថែមទៀត ជួយឱ្យក្រុមគ្រួសារមានអនាគតល្អ និង បំពេញក្ដីស្រម៉ៃចង់ធ្វើជាគ្រូបង្រៀន លោកឧកញ៉ា ប៉ិច បូឡែន បានឯកភាព នឹងផ្តល់ជូនការសិក្សាបន្ថែម ហើយនឹងផ្តល់ការងារជូនទាំងក្មួយស្រី ម្តាយរបស់គាត់ និង បងប្រុសម្នាក់របស់គាត់ផងដែរ។
សូមរំឭកផងដែរថា ថ្មីៗនេះ ក្មេងស្រីត្រូវបានផ្ទុះការចាប់អារម្មណ៍នៅលើបណ្ដាញសង្គម តាមរយៈវីដេអូកិច្ចសម្ភាសនិយាយភាសាបរទេសបានយ៉ាងល្អនៅឯជំរំភៀសសឹក រហូតត្រូវបានលោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី សម្របសម្រួលឱ្យទទួលបានការសិក្សាដ៏ពេញលេញ តាមរយៈការជួបលោកឧកញ៉ាបណ្ឌិត ប៉ិច បូឡែន អគ្គនាយកក្រុមហ៊ុន Westline Education Group៕
