ជួយគ្នាក្នុងគ្រាលំបាក! នី រតនា នាំប្រពន្ធកូន និង ក្រុមគ្រួសារ រៀបចំស្បៀង និង ថវិកា ចុះជួយវីរកងទ័ព និង គ្រួសារភៀសសឹកជាង ២០០ គ្រួសារ

មកដល់ពេលនេះ លើបណ្ដាញសង្គមមហាជនកម្ពុជា ក៏ដូចជាអ្នកសិល្បៈ បុគ្គលល្បីៗ ក៏ដូចប្រជាពលរដ្ឋខ្មែរទាំងមូល កំពុងបន្តរួបរួមគ្នាជួយជាតិមាតុភូមិតាមរយៈសកម្មភាពសប្បុរសធម៌ផ្សេងៗ ដោយបន្តនាំយកស្បៀងអាហារ សម្ភារៈ ថវិកា ជួយដល់បងប្អូនកងទ័ពជួរមុខ និង គ្រួសារភៀសសឹកបន្តបន្ទាប់។

លើសពីនេះ សប្បុរសជនកម្ពុជា និង អ្នកសិល្បៈជាច្រើន ក៏បានទៅចូលរួមរំលែកទុក្ខ និង គោរពវិញ្ញាណក្ខន្ធរបស់វីរកងទ័ពដោយផ្ទាល់ បង្ហាញការដឹងគុណ និង ចូលរួមរំលែកទុក្ខជាមួយគ្រួសារវីរកងទ័ពដែលបានពលីជីវិត ព្រមទាំងដោយនាំយកជាអំណោយ និង ថវិកាជូនគ្រួសារវីរកងទ័ពដើម្បីសម្រាលជីវភាពផងដែរ។

ក្នុងនោះ ក្រឡេកមើលហ្វេសប៊ុករបស់តារាចម្រៀងប្រុស នី រតនា ក៏បានចូលរួមជាចំណែកមួយជួយជាតិយ៉ាងសកម្មជាមួយក្រុមគ្រួសារ ដែលលោក និង ភរិយា ព្រមទាំងឪពុកម្ដាយ បងប្អូន បានចំណាយថវិកាផ្ទាល់ខ្លួន រៀបចំស្បៀងអាហារ សម្ភារៈផ្សេងៗ ចុះទៅជួយបងប្អូនគ្រួសារភៀសសឹកនៅខេត្តព្រះវិហារជាង ២០០ គ្រួសារ និង រៀបចំថវិកា ទៅសួរសុខទុក្ខវីរកងទ័ពនៅតាមមន្ទីរពេទ្យទៀតផង។

តាមរយៈការបង្ហោះសកម្មភាពសប្បុរសធម៌លក្ខណៈគ្រួសាររបស់លោក នី រតនា បានរៀបរាប់ថា ៖ «រួចរាល់សម្រាប់ការជួយបងៗវីរកងទ័ពអង់អាចក្លាហាននៅជួរមុខ និង នៅមន្ទីរពេទ្យ ព្រមទាំងបងប្អូនភៀសសឹកទាំង 200 គ្រួសារ អ្វីដែលខ្ញុំ និង ក្រុមគ្រួសារបានផ្តល់ជូន សង្ឃឹមថានឹងអាចជួយសម្រាលបន្ទុកបងប្អូនបានខ្លះ កម្ពុជាត្រូវការសន្តិភាព កម្ពុជាមិនត្រូវការសង្គ្រាមឡេីយ យេីងខ្ញុំទាំងអស់គ្នាជឿជាក់លេីរដ្ឋាភិបាលយ៉ាងមុតមាំ»៕