មេ ឬ អ្នកគ្រប់គ្រងមួយចំនួន អាងតែខ្លួនតួនាទីធំ ជាអ្នកសម្រេចចិត្ត តែងគិតថា មានតែគំនិតខ្លួនឯងប៉ុណ្ណោះទើបត្រឹមត្រូវ។ យ៉ាងណាមិញ ការមានគំនិតបែបនេះ នឹងធ្វើឱ្យបុគ្គលិកលែងហ៊ានបញ្ចេញគំនិត បង្អាក់ការបង្កើតអ្វីដែលថ្មី ហើយធ្វើអ្វីមិនសម្រេចជោគជ័យ។
ជាការពិតណាស់ ការលាក់គំនិតហើយមិនហ៊ានបញ្ចេញ គឺជាបញ្ហាមួយដែលតែងតែកើតមាននៅក្នុងបរិយាកាសការងារ។ បញ្ហានេះអាចបណ្ដាលមកពីកត្តាផ្សេងៗ ហើយវាអាចធ្វើឱ្យក្រុមការងារបាត់បង់ឱកាសក្នុងការអភិវឌ្ឍន៍។
មូលហេតុដែលនាំឱ្យបុគ្គលិកលាក់គំនិត
* ខ្លាចការរិះគន់ ឬ ការវិនិច្ឆយ: មនុស្សជាច្រើនខ្លាចថាគំនិតរបស់ខ្លួននឹងត្រូវបានគេបដិសេធ ឬ ត្រូវបានគេមើលងាយ។ ភាពភ័យខ្លាចនេះធ្វើឱ្យពួកគេមិនហ៊ានបញ្ចេញមតិ។
* អ្នកគ្រប់គ្រងមិនបើកចិត្តស្តាប់: ប្រសិនបើអ្នកគ្រប់គ្រងមិនលើកទឹកចិត្តបុគ្គលិកឱ្យបញ្ចេញមតិ ហើយមានទំនោរបន្ទោសពួកគេនៅពេលដែលមានកំហុស នោះបុគ្គលិកនឹងមិនហ៊ាននិយាយអ្វីទៀតទេ។
* ខ្វះទំនុកចិត្តលើខ្លួនឯង: បុគ្គលិកខ្លះមិនមានទំនុកចិត្តលើសមត្ថភាពរបស់ខ្លួនឯង ដូច្នេះពួកគេគិតថាគំនិតរបស់ពួកគេគ្មានតម្លៃ។
* ខ្លាចមានជម្លោះ: ការមានទស្សនផ្ទុយគ្នាពីអ្នកដទៃអាចនាំឱ្យមានជម្លោះ ដូច្នេះបុគ្គលិកខ្លះជ្រើសរើសយកវិធីមិននិយាយល្អជាង។
ផលប៉ះពាល់ដែលកើតឡើង
* បាត់បង់ឱកាសច្នៃប្រឌិត: គំនិតល្អៗជាច្រើនអាចត្រូវបានបាត់បង់នៅពេលដែលបុគ្គលិកមិនហ៊ានបញ្ចេញមតិ។
* បរិយាកាសការងារមិនល្អ: នៅពេលដែលបុគ្គលិកមិនមានការប្រាស្រ័យទាក់ទងល្អជាមួយគ្នា ភាពចុះសម្រុងក្នុងក្រុមក៏ថយចុះដែរ។
* ការសម្រេចចិត្តមិនគ្រប់ជ្រុងជ្រោយ: អ្នកគ្រប់គ្រងអាចធ្វើការសម្រេចចិត្ត ដែលខុសប្រសិនបើគាត់មិនបានទទួលព័ត៌មានពេញលេញពីបុគ្គលិក។
វិធីលើកទឹកចិត្តឱ្យបុគ្គលិកហ៊ានបញ្ចេញគំនិត
* បង្កើតបរិយាកាសសុវត្ថិភាព: អ្នកគ្រប់គ្រងត្រូវបង្កើតបរិយាកាសដែលបុគ្គលិកមានអារម្មណ៍សុវត្ថិភាពក្នុងការនិយាយអ្វី ដែលពួកគេគិត។
* ទទួលស្គាល់ការចូលរួម: ទោះបីជាមិនបានអនុវត្តតាមគំនិតរបស់បុគ្គលិកក៏ដោយ ក៏ត្រូវសរសើរ និង ទទួលស្គាល់ពីការចូលរួមរបស់ពួកគេ។
* ផ្តល់មតិយោបល់ដែលមានប្រយោជន៍: ជំនួសឱ្យការរិះគន់គំនិតរបស់បុគ្គលិក អ្នកគ្រប់គ្រងគួរផ្តល់ជាមតិយោបល់ ដែលអាចជួយឱ្យពួកគេកែលម្អគំនិតរបស់ខ្លួនបាន៕
ប្រភព៖ ឯកសារច្បាប់ និង រដ្ឋបាល
