ដំណឹងមរណភាពរបស់តារាចម្រៀងរ៉េបវ័យក្មេងដ៏ល្បីល្បាញ និង ជាគ្រូបង្វឹកមួយរូបក្នុងកម្មវិធី Rapper Fighter លោក RuthKo បានជួបគ្រោះថ្នាក់ចរាចរណ៍បាត់បង់ជីវិតកាលពីវេលាម៉ោង ១ និង ៤០ នាទីទៀបភ្លឺឈានចូលថ្ងៃទី ៦ ខែមករា ឆ្នាំ ២០២៥ នេះ នៅតែធ្វើឱ្យក្រុមគ្រួសារ មិត្តភក្តិ និង អ្នកគាំទ្រទទួលយកមិនទាន់បាននៅឡើយនោះទេ។
ស្របពេលមានកាចូលរួមរំលែកទុក្ខពីមរណភាពរបស់លោក RuthKo គេក៏សង្កេតឃើញមានការចែករំលែករូបភាពនៃគ្រោះថ្នាក់ចរាចរណ៍ ព្រមទាំងរូបសពរបស់លោក RuthKo នៅកន្លែងកើតហេតុតាមបណ្តាញសង្គម Telegram ផងដែរ ដែលទង្វើនេះបានធ្វើឱ្យមានការប៉ះពាល់អារម្មណ៍ក្រុមគ្រួសារយ៉ាងខ្លាំង។
ភ្លាមនោះដែរ តារាចម្រៀងរ៉េប ជូវី លីន ក៏បានបង្ហោះសារទទូចសុំចិត្តមហាជន និង អ្នកសារព័ត៌មាន ដែលបានចែករំលែករូបភាពទាំងនោះ សូមមេត្តាគោរពដល់សព និង សុំយល់ដល់អារម្មណ៍របស់ក្រុមគ្រួសារនៃសពផង ដោយបញ្ឈប់ការចែករំលែករូបភាព ក៏ដូចជាវីដេអូទាំងឡាយនោះតទៅទៀត។
លោក ជូវី បានរៀបរាប់ថា ៖ «សូមមេត្តាបងបង MEDIA ឈប់បង្ហោះ ឬក៏ចែកចាយរូបភាព និង វីដេអូ (censored picture) នៃការគ្រោះថ្នាក់របស់ RuthKo ផង។ សូមយកយល់ដល់អារម្មណ៍ក្រុមគ្រួសារ បងប្អូន និង មិត្តភក្តិ ដែលកំពុងកាន់ទុក្ខផង»៕
