ក្រោយពីបានផ្ទេរមកុដក្នុងនាមជា Miss Preteen Cambodia 2023 បានជាង ១ សប្ដាហ៍កន្លងទៅ មកដល់ថ្មីៗនេះ ក៏បានឃើញបវរកញ្ញាវ័យក្មេង ជូរី ល្អហួស បង្ហាញវត្តមានដាក់ពាក្យចូលរួមប្រកួតក្នុងកម្មវិធី Miss Teen & Miss Teen Icon Cambodia 2025 ជាផ្លូវការហើយ។
ក្នុងនោះដែរ ជូរី ល្អហួស ក៏បានបង្ហាញការតាំងចិត្តក្នុងការចូលរួមប្រកួតបវរកញ្ញាវ័យក្មេងម្ដងទៀតថា ៖ «នាងខ្ញុំយកសមត្ថភាពទៅប្រកួត ជាមួយនិងបទពិសោធន៍របស់នាងខ្ញុំ ឆ្នាំនេះដឹងតែមានអ្វីប្លែកជាងឆ្នាំរាល់ដង»។
ក្រោយពីបានឃើញបវរកញ្ញាវ័យរូបនេះ បានដាក់ពាក្យចូលប្រកួតក្នុងកម្មវិធីបវរកញ្ញាវ័យក្មេងម្ដងទៀត គឺកម្មវិធី Miss Teen & Miss Teen Icon Cambodia 2025 នេះ ឃើញថាលើបណ្ដាញសង្គមមហាជនអ្នកគាំទ្រវិស័យបវរកញ្ញាជាច្រើនបានបង្ហាញការគាំទ្រលើកទឹកចិត្តខ្លាំងចំពោះរូបនាង ប៉ុន្តែក្នុងនោះក៏មានមតិវែកញែកមួយចំនួនផងដែរ។
ស្របគ្នានេះ ក៏បានឃើញ ជូរី ល្អហួស បានចេញបង្ហោះសារជាថ្មី ដោយលើកឡើងពាក់ព័ន្ធនឹងកម្មវិធីប្រកួតនីមួយៗសុទ្ធសឹងតែមានភាពសុក្រឹត ដែលមើលលើសមត្ថភាពខ្លាំងទើបអាចឈ្នះ គឺមិនមែនជាការរៀបចំទុកមុនឡើយ។
ក្នុងនោះ ជូរី ល្អហួស បានរៀបរាប់ថា ៖ «ការដែលនាងខ្ញុំមកប្រកួតលើកនេះ គឺនាងខ្ញុំមកយកបទពិសោធន៍ថ្មីៗបន្ថែមទៀត ដើម្បីនាងខ្ញុំឈានចូលដល់កម្មវិធីធំៗ នៅថ្ងៃខាងមុខនេះ កម្មវិធីនីមួយៗគឺសុក្រឹតណាស់ អ្នកណាមានសមត្ថភាពខ្លាំង អ្នកនោះគឺជាឈ្នះ មិនមែនជាការចង្អុល ឬការចាប់ដាក់នោះទេ នាងខ្ញុំយកសមត្ថភាពទៅប្រកួត និង បទពិសោធន៍របស់នាងខ្ញុំជាច្រើន រួមទាំងការលើកទឹកចិត្តពីក្រុមគ្រួសារ ពុកម៉ែបងប្អូនប្រជាជនកម្ពុជា និង Fan Fan ជាច្រើន នាងខ្ញុំមានសិទ្ធគ្រប់គ្រាន់ក្នុងការជ្រើសរើសកម្មវិធីដែលនាងខ្ញុំស្រលាញ់ ចង់ចូលរួមប្រកួត ហើយក៏មិនមែនជាការរៀបចំទុកមុនដែរ»៕
