ថ្មីៗនេះ មហាជនអ្នកប្រើប្រាស់ប្រាស់បណ្ដាញសង្គមហ្វេសប៊ុក បាននាំគ្នាចែករំលែកបន្តគ្នាព្រោងព្រាតទុកជាមេរៀន និង ជាការដាស់តឿនដល់មនុស្សជុំវិញខ្លួន បន្ទាប់ពីបុរសម្នាក់ បានចែករំលែកបទពិសោធជូនអ្នកម្ដាយលាងឈាមរាល់សប្ដាហ៍ អស់រយៈពេលប្រមាណ ៣ ឆ្នាំ ព្រមទាំងណែនាំឱ្យបងប្អូនថែរក្សាតម្រងនោមរបស់ខ្លួន មុនពេលដែលវាត្រូវហួសពេល។
ជាក់ស្ដែងតាមរយៈគណនីដែលមានឈ្មោះ ឆាន់ ឌីម៉ង់ Dimang Chhann បានបង្ហោះសារចែករំលែកនៅថ្ងៃទី ១៨ ខែឧសភា ឆ្នាំ ២០២៥ ថា ៖ «ម្តាយខ្ញុំខូចតម្រងនោម ត្រូវលាងឈាមរាល់អាទិត្យ ជាង ៣ ឆ្នាំមកហើយ ពេលលាងម្តងៗមិនស្រួលនោះទេ សូមបងប្អូនថែរក្សាតម្រងនោមមុនពេលហួសពេល ចៀសវាងគ្រឿងស្រវឹង ភេសជ្ជៈផ្អែម ម្ហូបប្រៃពេក គ្រឿងផ្អាប់ អាហារដែលដាក់សារធាតុគីមី និង អាហារប៉ះពាល់ផ្សេងៗ។ ចៀសបានប៉ុនណាខំចៀសទៅ កុំគិតថាហូបបាន ហូបសិន សិនយូរៗទៅពិបាកហើយ តែបើតមហើយវានៅតែកើតមានទៀត ក៏អស់ចិត្តដែរ»។
តាមប្រភពដដែលបានបន្តទៀតថា ៖ «សូមទោសផងបើប៉ះពាល់អារម្មណ៍បងប្អូន ខ្ញុំគ្រាន់តែចង់ចែករំលែកនូវអ្វីដែលខ្ញុំបានជួបផ្ទាល់កន្លងមក ជូនបងប្អូនជ្រាបដើម្បីពិចារណាក្នុងការបរិភោគដើម្បីសុខភាព។ ថែរក្សាសុខភាពបានល្អ ដូចសន្សំប្រាក់សម្រាប់ខ្លួន និង កូនចៅនៅពេលក្រោយ»៕
