អ្នកទស្សនារឿងកំហឹងធ្មប់ ដែលជាភាពយន្តខ្មែរកំពុងទទួលបានការចាប់អារម្មណ៍ ប្រាកដជាបានស្គាល់នូវតួឯកប្រុសឈ្មោះ រិទ្ធ ដែលសម្តែងដោយកំលោះសង្ហាជាតារាកំពុងមានទីផ្សារទាំងក្នុង និង ក្រៅប្រទេសគឺ លោក អ៊ឹងហាវ។
ជាការពិត បើក្រឡេកទៅជីវិតពិតរបស់តួឯកប្រុសរូបនេះ ច្បាស់ណាស់! ផ្ទុយស្រឡះពីក្នុងសាច់រឿង ដែលអាជីពបច្ចុប្បន្ន លោកជាតារាសម្តែង តារាចម្រៀង តារាបង្ហាញម៉ូដ ហើយថែមទាំងបើកភ្នាក់ងារផ្ទាល់ខ្លួន ប្រជុំដោយបុគ្គលវ័យក្មេងមានទេពកោសល្យខ្ពស់ ដែលគេស្គាល់ឈ្មោះថា WAVE Management។
អ៊ឹងហាវ ជាតារាសិល្បៈមានប្រជាប្រិយភាពទាំងនៅកម្ពុជា និង នៅប្រទេសសិង្ហបុរី។ ជាក់ស្តែង បើនិយាយពីការបោះជំហានលើវិថីសិល្បៈ អ៊ឹងហាវ ត្រូវបានឪពុកម្តាយបញ្ជូនទៅសិក្សានៅប្រទេសសិង្ហបុរី តាំងពីអាយុ ៨ ឆ្នាំ។ លោកបានរំកិលខ្លួនចូលពិភពសិល្បៈនៅកម្ពុជាជាបណ្តើរៗនៅអំឡុងឆ្នាំ ២០២០ ស្របពេលត្រលប់មកស្រុកកំណើត ចំពេលវីរុសកូវីដកំពុងរាតត្បាត។
ដល់ឆ្នាំ ២០២១ ត្រលប់ទៅសិង្ហបុរីវិញ លោកបានស្វែងរកភ្នាក់ងារដើម្បីចូលសិល្បៈនៅទីនោះរហូតគេទទួលស្គាល់ ហើយក៏ចាប់ផ្តើមធ្វើជាតារាសម្តែង និង បង្ហាញម៉ូដតាំងពីពេលនោះមក។ ជារួម តួឯករិទ្ធមិនត្រឹមតែជាកំលោះសង្ហានៅក្នុងរឿងប៉ុណ្ណោះទេ តែជីវិតពិត ក៏ជាបុគ្គលមានទេពកោសល្យខ្ពស់ សមត្ថភាពខ្លាំង ពូកែរកស៊ី គួរជាទីចាប់ចិត្តផងដែរ៕
