អាចថាជានិស្ស័យ នារីម្នាក់កម្ពស់មិនសូវបាន សម្រស់វិញក៏មិនសូវណាស់ណា តែត្រូវបានពីឡុតរូបសង្ហាចាប់ចិត្ត ភ្ជាប់ស្នេហ៍ដោយសារក្រដាសតូចមួយ ជាមួយពាក្យពេចន៍សរសេរតែប៉ុន្មានឃ្លា។
នារីម្នាក់នេះមកពីរដ្ឋ អូហៃអូ សហរដ្ឋអាមេរិក នាងមានឈ្មោះថា Tanya Pidgorodetskiy អាយុ ២៥ ឆ្នាំ។ វីដេអូនិយាយអំពីប្រវត្តិស្នេហ៍របស់នាង បានផ្ទុះខ្លាំងនៅលើបណ្តាញសង្គម TikTok ប៉ុន្តែមហាជនភាគច្រើនគិតថា នាងជាអ្នកបង្កើតសាច់រឿងដោយខ្លួនឯង។
ជារឿងពិតនៃការជួបគ្នា ដំបូងឡើយនាង Tanya Pidgorodetskiy និង ក្រុមគ្រួសារ បានធ្វើការហោះហើរទៅកាន់ទីក្រុង Cleveland ដើម្បីត្រលប់មកផ្ទះវិញ។ មុនពេលឡើងយន្តហោះ នាងបានឃើញបុរសម្នាក់ក្នុងឯកសណ្ឋានពីឡុត រាងខ្ពស់ស្រឡះផុតគេ ប៉ុន្តែនាងមិនបានចាប់អារម្មណ៍អ្វីឡើយ។ លុះឡើងដល់លើយន្តហោះ នាងក៏បានឃើញបុរសនោះម្តងទៀត ជិះយន្តហោះតែមួយ តែដោយគេស្លៀកពាក់ឯកសណ្ឋាន នាងក៏សន្មតថា គេគឺជាពីឡុតបើកយន្តហោះ។
ក្រោយមកទៀត នាងបានដឹងថាបុរសនោះមិនបានឡើងយន្តហោះ ដើម្បីបំពេញការងារនោះទេ តែគេកំពុងធ្វើដំណើរទៅរដ្ឋ Buckeye ដើម្បីបើកយន្តហោះផ្សេង។
អំឡុងពេលហោះហើរ នាងមិនបានចាប់អារម្មណ៍លើបុរសនោះឡើយ លុះរហូតដល់ ២០ នាទីចុងក្រោយ មុនយន្តហោះចុះចត ទើបមានអ្នកបម្រើការលើយន្តហោះម្នាក់បានឱ្យក្រដាសមួយសន្លឹកទៅនាង។ ដំបូងនាងហាក់មានអារម្មណ៍ភ័យផង ភាំងផង ដោយឱ្យម្តាយ និង ប្អូនស្រីរបស់នាងជាអ្នកអានមុន។
នៅលើក្រដាស បុរសនោះបានសរសេរថា៖ «សួស្តី! ខ្ញុំជឿជាក់ថា អ្នកតែងតែទទួលបានការសរសេរបែបនេះគ្រប់ពេល ប៉ុន្តែខ្ញុំចង់នាំអ្នកទៅញុំាអាហារពេលល្ងាច និង ដើម្បីស្គាល់អ្នក។ ប្រើសិនបើនោះជាអ្វីដែលអ្នកអាចទៅរួច សូមប្រាប់ខ្ញុំឱ្យដឹង»។ នៅក្រោមពាក្យសរសេរ បុរសរូបនោះក៏បានដាក់លេខទូរស័ព្ទផងដែរ។
យ៉ាងណាក្តី ក្រោយយន្តហោះចុះចត ក្នុងថ្ងៃដដែល នាង Pidgorodetskiy បានឆាតទៅបុរសនោះ រួចអ្នកទាំងពីរក៏បានជួបគ្នានៅថ្ងៃបន្ទាប់។ អ្នកទាំងពីរបានទទួលទានអាហារពេលល្ងាចជាមួយគ្នាក្នុងឱកាសថ្ងៃបុណ្យ Halloween។ ពេលជួបគ្នាភ្លាម អ្នកទាំងពីរមានទំនាក់ទំនងស្នេហាភ្លែត ហើយបានបណ្តើរគ្នាយ៉ាងរ៉ូមែនទិកច្រើនម៉ោងនៅក្នុងទីក្រុង។
នាង Pidgorodetskiy និយាយថា សព្វថ្ងៃ នាង និង គូស្នេហ៍ ស្រលាញ់គ្នាខ្លាំង បាត់មុខមិនបានឡើយ។ ខាងបុរសគូសង្សារជំនាញខាងយល់ចិត្ត ហើយថែមទាំងស្និទ្ធស្នាលជាមួយគ្រួសារនាង ដោយឆ្លៀតពេលទៅបង្រៀនក្មួយស្រី និង ក្មួយប្រុសរបស់នាងលេងកូនហ្គោលទៀតផង៕
ប្រភព៖ NYP
