ថ្មីៗនេះ អ្នកលេងបណ្តាញសង្គមហ្វេសប៊ុក និង អ្នកគាំទ្រ ព្រមទាំងមិត្តក្នុងសិល្បៈ របស់តារាចម្រៀង លោក ណាន វីសារ ច្បាស់ជាបានជ្រាបមកហើយ នៃការរៀបចំមូលនិធិជួយដល់កងទ័ពជួរមុខកម្ពុជារបស់លោកដោយមានឈ្មោះថា «សំឡេង វីសារ ដើម្បីកងទ័ពកម្ពុជា»។ ក្នុងនោះដែរ មូលនិធិខាងលើក៏បានអមនូវពាក្យស្លោកយ៉ាងមានន័យថា «ច្រៀងដើម្បីជួយ-ឈ្នះដើម្បីជាតិ»។
ក្នុងនោះ មូលនិធិរបស់ លោក ណាន វីសារ បានចាប់ផ្តើមតាំងពីថ្ងៃទី ០៤ ខែតុលា ឆ្នាំ ២០២៥ កន្លងទៅ ដោយកម្មវិធីនេះ លោកធ្វើដំណើរតាមរយៈការជិះម៉ូតូច្រៀងពីភ្នំពេញ ទៅកាន់ខេត្តព្រះវិហារ ដោយឆ្លងកាត់ ៨ ខេត្ត និង ២២ ស្រុក តាមបណ្តោយផ្លូវជាតិលេខ ៥។
យ៉ាងណាមិញ គិតត្រឹមថ្ងៃទី ០៨ ខែតុលា ឆ្នាំ ២០២៥ នេះ គឺរយៈពេល ៥ ថ្ងៃមកហើយ នៃដំណើរជិះម៉ូតូច្រៀងរបស់លោក ណាន វីសារ ដោយថ្ងៃនេះ លោកបាន និង កំពុងធ្វើដំណើរទៅកាន់ស្រុកបាកាន និង ស្រុកមោងឫស្សី ទីរួមខេត្តបាត់ដំបង។
ដោយឡែក ដំណើរនៃការជិះម៉ូតូរបស់លោក ណាន វីសារ បើទោះជាមានផលលំបាកខ្លះ ក៏ព្រោះតែត្រូវជិះឆ្លងស្រុក ឆ្លងខេត្តទាំងហាលក្តៅ ហាលខ្យល់ ហាលភ្លៀងក្តី ប៉ុន្តែតារាប្រុសរូបនេះ បានបង្ហាញស្នាមញញឹមពេញទំហឹង ខណៈមានបងប្អូនប្រជាពលរដ្ឋជាច្រើននៅតាមផ្លូវបានផ្តល់កម្លាំងចិត្តដល់លោក និង ចូលរួមបរិច្ចាគថវិកាទៅកាន់មូលនិធិនេះជាច្រើន។
គួរជម្រាបថា ដំណើរនៃការជិះម៉ូតូច្រៀងរបស់លោក ណាន វីសារ ពីភ្នំពេញ ឆ្ពោះទៅកាន់ខេត្តព្រះវិហារ ចាប់ផ្តើមពីថ្ងៃទី ០៤ ខែតុលា ឆ្នាំ ២០២៥ រហូតដល់ថ្ងៃទី ១៣ ខែតុលា ឆ្នាំ ២០២៥ ខាងមុខនេះ៕
