នៅថ្ងៃទី ២២ ខែមករា ឆ្នាំ ២០២៥ ក្រសួងធនធានទឹក និង ឧតុនិយម បានចេញសេចក្តីជូនដំណឹងឱ្យបានដឹងថា ចាប់ពីថ្ងៃទី ២៣ ដល់ថ្ងៃទី ៣១ ខែមករា ឆ្នាំ ២០២៥ នៅតាមតំបន់វាលទំនាប តំបន់ខ្ពង់រាប តំបន់ជួរភ្នំ និង តំបន់មាត់សមុទ្រ ចាប់ពីម៉ោង ២៖០០ យប់ រហូតដល់ម៉ោង ៧៖០០ ព្រឹក នឹងមានបាតុភូតចុះអ័ព្ទកើតឡើង នៅក្នុងព្រះរាជាណាចក្រកម្ពុជា។
ក្នុងនោះ ក្រសួងបានបញ្ជាក់ឱ្យដឹងទៀតថា បាតុភូតចុះអ័ព្ទនេះនឹងមានការរំខានដល់ការធ្វើដំណើររបស់បងប្អូនប្រជាពលរដ្ឋ ដែលអាចធ្វើឱ្យអ្នកដំណើរមានការលំបាកខ្លះៗក្នុងពេលធ្វើដំណើរចរាចរណ៍។
អាស្រ័យហេតុនេះ សូមសាធារណជន និង អាជ្ញាធរដែនដី មេត្តាយកចិត្តទុកដាក់ប្រុងប្រយ័ត្នខ្ពស់អំពីស្ថានភាពធាតុអាកាសចុះអ័ព្ទនេះ ដើម្បីជៀសវាងពីគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ហើយក្រសួងនឹងបន្តធ្វើការតាមដាន និង វិភាគអំពីស្ថានភាពធាតុអាកាស ដើម្បីជម្រាបជូនជាបន្តបន្ទាប់ ក្នុងករណីមានការប្រែប្រួល៕
សូមអានសេចក្ដីជូនដំណឹងនៅខាងក្រោម ៖
