អ្នកគាំទ្រតាមដានជីវិតឯកជន និង ការងាររបស់រាជិនីក្រមា មាន សូនីតា ច្បាស់ជាបានជ្រាបហើយថា ក្រៅពីអាជីពជាសិល្បៈ កញ្ញាក៏ជាស្ថាបនិកហាង ផ្ទះស្រលាញ់ ដែលលក់ផលិតផលក្រមាខ្មែរ និង សម្លៀកបំពាក់ធ្វើពីក្រមា ដែលមានយីហោ «ផ្ទះស្រឡាញ់»។
បើគិតមកទល់ពេលនេះ អាជីវកម្មហាងរបស់ កញ្ញា មាន សូនីតា បានដំណើរការរយៈពេលប្រមាណជិត ១០ ឆ្នាំ មកហើយ ដោយដំបូងឡើយនាងបានចាប់ផ្តើមបេសកកម្មមួយគឺ «ស្រលាញ់ក្រមាខ្មែរ»។
យ៉ាងណាមិញ រយៈពេលជិត ១០ ឆ្នាំ នៃការបង្កើតហាង «ផ្ទះស្រឡាញ់» ថ្មីៗនេះ កញ្ញា មាន សូនីតា បានបង្ហោះសាររៀបរាប់ពីផលលំបាក និង ការប្រឹងប្រែងអស់រយៈពេលជាច្រើនឆ្នាំនេះ នៅតែមិនទាន់មានអ្នកគាំទ្រក្រមាខ្មែរនៅឡើយ។
ក្នុងនោះ តារាស្រីខាងលើបានរៀបរាប់ថា៖ «ក្រមាខ្មែរ ផលិតផលខ្មែរ ផលិតនៅខ្មែរ! រំឭកប្រវត្តិខ្លះៗ ពីដំណើរដ៏ជូរចត់របស់ក្រមាខ្មែរ គឺជាការតស៊ូជិត ១០ ឆ្នាំមកហើយ នៅតែមិនមានការគាំទ្រដដែល។ ផ្ទះស្រលាញ់បានបង្កើតតាំងពី ២០១៦ មកម្ល៉េះ ខ្ញុំបានបង្កើត និង តស៊ូខ្លាំងណាស់ទោះបីខាតរាល់ខែ ហើយមានឧបសគ្គអ្វីក៏ដោយ ក៏ប្រឹងតស៊ូជម្នះបើកដល់សព្វថ្ងៃនេះដែរ ក៏ព្រោះតែគិតថាបើខ្ញុំមិនធ្វើ បើខ្ញុំមិនការពារ បើខ្ញុំមិនអភិរក្ស បើខ្ញុំមិនអភិវឌ្ឍន៍ បើខ្ញុំមិនស្រលាញ់ តើមានអ្នកណាមកអើពើ? នាងខ្ញុំ មាន សូនីតា ក្នុងនាមជាកូនខ្មែរ សូមស្រលាញ់ឱ្យចេញពីចិត្ត កុំស្រលាញ់តែមាត់ គាំទ្ររបស់ខ្មែរឡើង ដើម្បីឱ្យពលរដ្ឋខ្មែរមានមុខរបរ និង សេដ្ឋកិច្ចខ្មែរមានការកើនឡើង Slanh House ផ្ទះស្រលាញ់»៕
