គិតមកដល់ពេលនេះ រយៈពេលជិត ៥ ខែមកហើយ ដែលសេដ្ឋីនីអារ៉ាប់រួម កញ្ញា Mahra Lutfi បានគ្រងមកុដកម្មវិធីអន្តរជាតិនៅកម្ពុជា Miss Planet International 2024 ដែលជាបវរកញ្ញាដ៏ស័ក្តិសមពេញដោយសមត្ថភាព ចំណេះដឹង រូបសម្រស់ និង អត្តចរិតគួរឱ្យស្រឡាញ់។
បន្ទាប់ពីក្លាយជាម្ចាស់មកុដ MPI 2024 ប៉ុន្មានខែកន្លងមកនេះ ក្រឡេកមើលពីសកម្មភាពរបស់កញ្ញា Mahra Lutfi ខណៈវិលត្រឡប់ទៅកាន់ប្រទេសអារ៉ាប់រួមវិញ និង បង្ហាញសកម្មភាពការងារយ៉ាងសកម្មក្នុងនាមជា Miss planet International 2024 ព្រមទាំងបានចូលរួមកម្មវិធីធំៗលំដាប់ពិភពលោកជាច្រើន លើទឹកដីទីក្រុងឌូប៉ៃ និង នៅប្រទេសផ្សេងៗទៀត។
ដោយឡែក ស្របពេលបំពេញតួនាទីយ៉ាងសកម្មជា Miss Planet International 2024 និង ជិតដល់ពេលវេលាមកកាន់កម្ពុជាផ្ទេរមកុដឱ្យម្ចាស់មកុដថ្មី MPI 2025 ថ្មីៗនេះ ក៏បានទទួលដំណឹងថា សេដ្ឋីនីអារ៉ាប់រួមរូបនេះ ក្ដាប់បានឱកាសថ្មីមួយទៀត គឺក្លាយជាម្ចាស់មកុដ Miss Universe UAE 2025 ដែលនឹងត្រៀមខ្លួនចូលរួមប្រកួតដណ្ដើមមកុដកម្មវិធីលំដាប់ពិភពលោក Miss Universe 2025 ក្នុងឆ្នាំនេះផងដែរ៕
