ជិតដល់ថ្ងៃរៀបការ តារាស្រីម្នាក់នៅឥណ្ឌូនេស៊ី គ្រាន់តែឃើញចំនួនលុយក្នុងកុងធនាគារគូដណ្តឹង សុំផ្ដាច់ពាក្យវិញភ្លាម

ថ្មីៗនេះ Saidah Kamarudin តារាសម្តែងជនជាតិម៉ាឡេស៊ីវ័យ ២៨ ឆ្នាំម្នាក់ បានចេញមុខមកទម្លាយពីមូលហេតុនៃការរំសាយមង្គលការរបស់នាងជាមួយនឹងអតីតគូដណ្តឹង ព្រោះតែនាងហួសចិត្តជាមួយនឹងចំនួនលុយនៅក្នុងកុងធនាគាររបស់គេ។

តាមសារព័ត៌មាន Sin Chew Daily បានឱ្យដឹងថា Saidah បានទាក់ទងជាមួយនឹងសង្សារវ័យ ២២ ឆ្នាំម្នាក់ឈ្មោះ Muhammad Muntazar Gufran តាំងពីឆ្នាំ ២០២៣ កន្លងទៅម្ល៉េះ ហើយក៏បានភ្ជាប់ពាក្យនឹងគ្នាកាលពីខែឧសភា ឆ្នាំ ២០២៤ កន្លងទៅ តែនៅក្នុងខែតុលា ឆ្នាំដដែល ពួកគេក៏បានចែកផ្លូវគ្នា។ យ៉ាងណាមិញ លុះកន្លងទៅអស់រយៈពេល ៨ ខែ ទើបនាងចេញមុខបកស្រាយប្រាប់ពីមូលហេតុនៃការចែកផ្លូវថា គឺដោយសារតែបញ្ហាលុយកាក់របស់ខាងប្រុស។

នាងបានឱ្យដឹងថា នាង​បានរៀបចំចំណាយច្រើនណាស់សម្រាប់ពិធីមង្គលការ ហើយនាងក៏ឱ្យខាងប្រុសបង្ហាញកុងធនាគារឱ្យនាងមើល តែនាងពិតជាហួសចិត្តណាស់ ព្រោះគេមានត្រឹមតែ ៥០០ រីងគីត ឬប្រមាណជាង ១០០ ដុល្លារប៉ុណ្ណោះ។ តើឱ្យនាងពឹងគេយ៉ាងណា បើគេចិញ្ចឹមខ្លួនឯងសឹងតែមិនរស់ផងនោះ។ ដោយឡែក តាមពិតទៅនាងគិតថានឹងមិនទម្លាយរឿងនេះប្រាប់នរណាឡើយ តែខាងប្រុសបានលួចចូលក្នុងគណនី TikTok របស់នាង ហើយលួចផុសធ្វើដូចជានាងពិបាកចិត្តខ្លាំងណាស់ចំពោះការចែកផ្លូវនេះ ទើបនាងខឹង និង បានប្តឹងប៉ូលិស ព្រមទាំងសម្រេចចិត្តទម្លាយរឿងរ៉ាវទាំងអស់តែម្តង៕

ប្រភព​៖ Sanook