និយាយពីបវរកញ្ញា អ៊ិន លក្ខិណា ចាប់តាំងពីទទួលបានតំណែងជា Miss Cosmo Cambodia 2024 និង ជា Top 10 នៃកម្មវិធី Miss Cosmo 2024 មក នាងបានក្លាយជាបវរកញ្ញាមានសក្ដានុពលក្នុងចិត្តមហាជនអ្នកគាំទ្រស្រឡាញ់គាំទ្រនាងខ្លាំង ដែលចូលចិត្តតាមដានសកម្មភាពនាងមិនថាចូលរួមកម្មវិធីបវរកញ្ញា ឬ កម្មវិធីផ្សេងៗទាំងក្នុង និង ក្រៅប្រទេស។
ដ្បិតតែ ទទួលបានត្រឹម Top 10 ក្នុងកម្មវិធីអន្តរជាតិ Miss Cosmo 2024 មែន ប៉ុន្តែឃើញថាបវរកញ្ញាកម្ពុជាដ៏លេចធ្លោរូបនេះ ហាក់មានឥទិ្ធពលខ្លាំងមិនចាញ់ម្ចាស់ជ័យលាភីគ្រងមកុដឡើយ ដែលនាងអាចឆក់បានការស្រឡាញ់ពេញចិត្តខ្លាំងពីអ្នកគាំទ្រនៅក្រៅស្រុក និង មានការងារយ៉ាងសកម្មលើឆាកអន្តរជាតិ Miss Cosmo នៅឯប្រទេសវៀតណាមជាហូរហែទៀតផង។
ដោយឡែក ស្របពេលកម្មវិធីក្នុងស្រុក Miss Cosmo Cambodia កំពុងប្រកួតជ្រើសរើសរាជិនីមកុដថ្មីក្នុងឆ្នាំ ២០២៥ នេះ និង ជាវេលាដែលបវរកញ្ញា អ៊ិន លក្ខិណា ផ្ទេរមកុដឱ្យអ្នកបន្ត ថ្មីៗនេះ ក៏ទទួលបានដំណឹងដ៏រំភើបមួយ ធ្វើឱ្យមហាជនអ្នកគាំទ្រកាន់តែមានមោទកភាពចំពោះបវរកញ្ញា អ៊ិន លក្ខិណា ខ្លាំង ដោយនាងទទួលបានតំណែងដ៏ធំមួយទៀត គឺជាឯកអគ្គរដ្ឋទូតនៃអានុភាពរបស់កម្មវិធីអន្តរជាតិ Miss Cosmo។
បើតាមរយៈហ្វេសប៊ុកផេក Miss Cosmo Cambodia បានបង្ហោះជូនដំណឹងថា ៖ «សូមស្វាគមន៍ ឯកអគ្គរដ្ឋទូតនៃអានុភាព របស់ស្ថាប័ន Miss Cosmo! យើងពិតជាមានមោទកភាពក្នុងការប្រកាសជាផ្លូវការថា កញ្ញា អ៊ិន លក្ខិណា Leakena In ដែលជាកំពូលទាំង ១០ នៃ Miss Cosmo ២០២៤ មាននាមជា ឯកអគ្គរដ្ឋទូតនៃអានុភាព របស់ស្ថាប័ន Miss Cosmo! ពោរពេញដោយភាពថ្លៃថ្នូរ អង់អាច និងទេពកោសល្យ កញ្ញា លក្ខិណា បានឆក់យកបេះដូងទស្សនិកជនជាច្រើនជាមួយនឹងភាពជឿជាក់ និងភាពលេចធ្លោដ៏មានឥទ្ធិពលនៅលើឆាក ដោយបាននាំមកនូវមោទកភាពដ៏អស្ចារ្យដល់ប្រទេសកម្ពុជា។ ការខិតខំប្រឹងប្រែងរបស់នាងមានតម្លៃធំធេងជាងមកុដ ដែលនេះជារឿងរ៉ាវដ៏មានឥទ្ធិពលអំពីការប្ដេជ្ញាចិត្ត ការតស៊ូ និងការបំផុសគំនិត។ ក្នុងនាមជា ឯកអគ្គរដ្ឋទូតនៃអានុភាពរបស់ស្ថាប័ន Miss Cosmo របស់យើង កញ្ញា លក្ខិណា ប្រៀបបានទៅនឹងរស្មីនៃក្តីសង្ឃឹមក្នុងការផ្លាស់ប្តូរ និងផ្តល់នូវអានុភាពដល់អ្នកជំនាន់ក្រោយដែលមានក្តីស្រមៃក្នុងការបង្ហាញភាពជាខ្លួនឯងជាមួយសម្រស់ដ៏អស្ចារ្យ និងគោលដៅដ៏ហ្មត់ចត់។ កញ្ញាមិនត្រឹមតែជាគំរូទេ ប៉ុន្ដែជាអ្នកត្រួសត្រាយផ្លូវឆ្ពោះទៅរកភាពផ្លាស់ប្តូរ ក្នុងការតំណាងប្រទេសកម្ពុជាទៅលើឆាកអន្តរជាតិ។ ចូលរួមជាមួយ Miss Cosmo Cambodia ទាំងអស់គ្នា ដើម្បីអបអរដំណើររវិសេសវិសាលរបស់កញ្ញា លក្ខិណា!»៕
