ទាក់ទងនឹងជីវិតឯកជនរបស់តារាស្រីរូបស្រស់ សុខ សោម៉ាវត្តី មហាជនអ្នកគាំទ្រសុទ្ធតែបានជ្រាបហើយ ក្រោយពីជួបរឿងខកបំណងលើជីវិតស្នេហាម្ដងហើយម្ដងទៀត ប៉ុន្មានឆ្នាំមកនេះ គេឃើញថាតារាស្រីរូបនេះ មិនខ្វល់ខ្វាយរកអ្នកស្អំបេះដូងថ្មីទៀតឡើយ ដោយបន្តស្ពាយឈ្មោះជាអ្នកមេម៉ាយដ៏រឹងមាំចិញ្ចឹមកូនស្រីបណ្ដូលចិត្តតែម្នាក់ឯង។
ម្យ៉ាងវិញទៀត ស្របពេលកូនស្រីបណ្ដូលចិត្តកាន់តែធំពេញរូបពេញរាង តារាស្រីរូបនេះ កាន់តែលែងខ្វល់ចង់សាងគូជីវិតថ្មី ដោយផ្ដោតតែលើការងាររកស៊ីចិញ្ចឹមកូនស្រី និង មើលថែខ្លួនស្រស់ស្អាតខ្ញង់ឡើង។
លើសពីនេះ អ្នកម្ដាយរូបស្រស់ សុខ សោម៉ាវត្តី ហាក់កាន់តែមានក្ដីសុខពេញលេញក្នុងជីវិត ដែលនាងយល់ថាមានកូនស្រីបណ្ដូលចិត្តរូបនេះតែម្នាក់គឺគ្រប់គ្រាន់ ដែលខ្លួនជាប៉ាផង ជាម៉ាក់ផង រីឯកូនស្រីប្រៀបដូចជាមិត្តផង។
ដោយឡែក ថ្មីៗនេះ អ្នកម៉ាក់រូបស្រស់ សុខ សោម៉ាវត្តី បានធ្វើឱ្យមហាជនអ្នកគាំទ្រលើបណ្ដាញសង្គមប្លែកចិត្ត ដែលធ្លាប់តែឃើញនាងបង្ហាញជីវិតបែបអ្នកម៉ាក់រឹងមាំ ២ នាក់កូនស្រីបណ្ដូលចិត្ត តែលើកនេះនាងបង្ហាញសកម្មភាពធ្វើខ្លួនខ្ញង់ៗចេញក្រៅបែបយុវវ័យម្ដង ថែមទាំងពោលពាក្យជុំវិញរឿងស្នេហា ហាក់ដូចចង់គិតគូររកអ្នកស្អំបេះដូងថ្មីអ៊ីចឹង។ ក្នុងនោះ អ្នកនាង សុខ សោម៉ាវត្តី បានបង្ហោះរៀបរាប់ថា ៖ «កុំសំងំតែក្នុងផ្ទះពេក ចេញមកកាហ្វេខ្លះមក ក្រែងគូព្រេងយើងនៅហាងកាហ្វេ»៕
