ពិតណាស់ ជុំវិញរឿងរ៉ាវរបស់អ្នកជំនួញអនឡាញល្បីឈ្មោះ អ្នកនាង Madam Da មហាជនអ្នកតាមដានលើបណ្ដាញសង្គមច្បាស់ជាបានជ្រាបខ្លះៗមកហើយនូវរឿងរ៉ាវពាក់ព័ន្ធនឹងហរិញ្ញវត្ថុ ការរកស៊ីរបស់អ្នកនាង រហូតធ្វើឱ្យមហាជនខ្លះបានប្រើពាក្យទៅកាន់នាងថា «មានប្រហោងក្នុង»។
យ៉ាងណាមិញ មកដល់ថ្ងៃទី ០៤ ខែមេសា ឆ្នាំ ២០២៥ កន្លងទៅនេះ គេបានឃើញប្អូនស្រីបង្កើតតែម្នាក់របស់ Madam Da គឺអ្នកលក់អនឡាញល្បីដូចគ្នា អ្នកនាង Madam Chorda ក៏បានបង្ហោះសារបង្ហាញអារម្មណ៍ និង គាស់កកាយពីផលវិបាករបស់បងស្រី ដែលបានជួបប្រទះកន្លងមកពាក់ព័ន្ធនឹងបញ្ហាលុយកាក់រាប់សិបម៉ឺនដុល្លារ។
ក្រោយពីបានឃើញការបង្ហោះរបស់ប្អូនស្រីបង្កើត Madam Da រៀបរាប់ជុំវិញរឿងរ៉ាវខាងលើ ធ្វើឱ្យមហាជនផ្ទុះចាប់អារម្មណ៍ជាថ្មី ក៏ដូចជាអ្នកសិល្បៈដែលស្គាល់អ្នកជំនួញរូបនេះ បានចែករំលែកសារបន្តភ្ជាប់ជាមួយមតិរៀងៗខ្លួន។ ក្នុងនោះ ក៏បានឃើញហ្វេសប៊ុករបស់អតីតតារាស្រី ជំទាវ លី ឈី ក៏ចែករំលែកពីការបង្ហោះរបស់ប្អូនស្រី Madam Da លើកនិយាយពីរឿងនេះ ក្នុងនាមជាអ្នករកស៊ីដូចគ្នា។ លើសពីនោះ សារនោះ ជំទាវ លី ឈី ក៏បានលើកទឹកចិត្តដល់ Madam Da ថែមទៀតផង។
សារនោះ ជំទាវ លី ឈី បានរៀបរាប់ថា ៖ «នាងខ្ញុំក៏ជាអ្នករកស៊ី យល់អារម្មណ៍នេះច្បាស់! ការរកស៊ី ការសម្រេចចិត្ត មានត្រូវ មានខុស ពេលខ្លះយើងគិតថាធ្វើត្រូវ បែរជាខុស ហើយខាតបង់ ការរាប់អានដូចគ្នា។ បើរាប់មនុស្សខុស ប្រកដជាមានបញ្ហា និង ខាតបង់ជាក់ជាមិនខាន។ ខ្ញុំសូមលើកទឹកចិត្ត ម៉ាដាម ខំប្រឹងក្រោកឡើង ដួលកន្លែងណា ក្រោកកន្លែងនោះ ស៊ូៗ »។ លើសពីនោះ ស្វាមីជំទាវ លី ឈឺ គឺឧកញ៉ា ប៊ុន រតនា ក៏បញ្ចេញមតិស្រដៀងភរិយាដែរថា៖ «ជីវិតអ្នករកសុី មានត្រូវ មានខុស ជារឿងធម្មតា
ដួលកន្លែងណា ប្រឹងក្រោកកន្លែងហ្នឹង»៕
‘
